​ຍີນ​ດີ​ຕ້ອນ​ຮັບ ​ສູ່​ເວັບ​ໄຊ ພະ​ແນກ ວິ​ທະ​ຍາ​ສາດ ແລະ ເຕັກ​ໂນ​ໂລ​ຊີ ແຂວງ ເຊກອງ

ໜ່ວຍຊາວໜຸ່ມຮາກຖານ ພວຕ ແຂວງເຊກອງ ມອບເຄື່ອງຊຸກຍູ້ວຽກງານປ້ອງກັນໂຄວິດ-19

ໃນຕອນບ່າຍວັນທີ 11 ພຶດສະພາ 2020 ຄະນະ ຊາວໜຸ່ມຮາກຖານພະແນກ ວິທະຍາສາດ ແລະ ເຕັກໂນໂລຊີແຂວງ ເຊກອງພ້ອມດ້ວຍສະມາຊິກ ຊາວໜຸ່ມພາຍໃນ ໜ່ວຍໄດ້ໄປມອບເຄື່ອງຈຳນວນ ໜຶ່ງໃຫ້ຄະນະ

ກໍາມະການຊາວໝຸ່ມແຂວງເຊກອງ ເພື່ອສົມທົບວັດຖຸປັດໃຈເຂົ້າໃນກິດຈະກຳ ສ້າງຂະບວນການຊາວໜຸ່ມຮ່ວມ ແຮງຮ່ວມ ໃຈປ້ອງກັນພະຍາດໂຄວິດ-19 ນຳໄປມອບໃຫ້ພະນັກງານວິຊາສະເພາະທີ່ປະຕິບັດໜ້າທີ່ຢູ່ຈຸດກວດກາ ດ່ານຊາຍແດນ ຂາເຂົ້າ-ຂາອອກ ລະຫວ່າງແຂວງຕໍ່ແຂວງ ຢູ່ເມືອງທ່າແຕງ ແຂວງເຊກອງຄື:ບ້ານກົກພຸງ (ເມືອງທ່າແຕງ, ແຂວງເຊກອງ ກັບ ເມືອງເລົ່າງາມ, ແຂວງສາລະວັນ)​  ແລະບ້ານຫຼັກຂາວ (ເມືອງທ່າແຕງ, ແຂວງເຊກອງ ກັບເມືອງ ປາກຊ່ອງ ແຂວງຈຳປາສັກ)​.

        ພິທີມອບ-ຮັບໄດ້ຈັດຂື້ນຢູ່ ສູນຮຽນຮູ້ພາສາອັງກິດຊາວໝຸ່ມ ແຂວງເຊກອງ ໃນໂອກາດນີ້ກ່າວມອບໂດຍ ທ່ານ ນາງ ສິດທິພອນ ສີບຸນຄໍ້າ ເລຂາໝ່ວຍຊາວໜຸ່ມຮາກຖານພະແນກວິທະຍາສາດ ແລະ ເຕັກໂນໂລຊີແຂວງ ແລະ ກ່າວຮັບໂດຍທ່ານ ສຸກັນຍາ ອິນທະວົງ ຫົວໜ້າຂະແໜງຂະບວນການພັດທະນາຊາວໜຸ່ມ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຄີພະຍານ.

        ຈຸດປະສົງແມ່ນເພື່ອນຳເອົາວັດຖຸ ແລະ ປັດໃຈຕ່າງໆ ທີ່ໄດ້ຈາກການປະກອບສ່ວນ ຂອງສະມາຊິກຊາວໜຸ່ມພາຍໃນໜ່ວຍຮາກຖານ ແນກວິທະຍາສາດ ແລະ ເຕັກໂນໂລຊີແຂວງ ໄປສົມທົບປະກອບສ່ວນຊຸກຍູ້ວຽກງານປ້ອງກັນໂຄວິດ-19 ແລະການມອບເຄື່ອງຄັ້ງນີ້ ເປັນການປະກອບສ່ວນອັນສໍາຄັນ ທີ່ຊ່ວຍເຫລືອສັງຄົມ ທັງເປັນການໃຫ້ກໍາລັງໃຈແກ່ເຈົ້າໜ້າທີ່ຜູ້ເສຍສະຫຼະສະຕິປັນຍາ,ເຫື່ອແຮງເພື່ອຊາດ ເພື່ອປະຊາຊົນ ຊ່ວຍຄວບຄຸມ ແລະ ຕ້ານການລະບາດຂອງພະຍາດໂຄວິດ-19 ເຊິ່ງວັດຖຸປັດໃຈທີ່ນໍາໄປປະກອບສ່ວນໃນຄັ້ງນີ້ ປະກອບມີນໍ້າດື່ມຈໍານວນ 10 ແກັດຄິດເປັນມູນຄ່າລວມເທົ່າກັບ 250.000 ກີບ, ວັດຖຸປັດໃຈທີ່ນຳປະກອບສ່ວນ ໃນຄັ້ງນີ້ເຖິ່ງແມ່ນວ່າຈະມີມູນຄ່າບໍ່ຫຼາຍ, ແຕ່ສະແດງໃຫ້ເຫັນເຖິງນ້ຳຈິດນ້ຳໃຈ, ຄວາມສາມັກຄີຮັກແພງ ເອື້ອເຟື້ອເພື່ອແຜ່ ຊ່ວຍເຫຼືອເຊິ່ງກັນ ແລະກັນ ຂອງສະຫາຍ ສະມາຊິກຊາວໜຸ່ມໃນຍາມທີ່ແຂວງ ກໍຄືປະເທດຊາດມີຄວາມຫຍຸ້ງຍາກ.

        ໂອກາດນີ້, ສຸກັນຍາ ອິນທະວົງ ຫົວໜ້າຂະແໜງຂະບວນການພັດທະນາຊາວໜຸ່ມ ໄດ້ກ່າວສະແດງຄວາມຂອບໃຈມາຍັງຊາວໜຸ່ມຮາກ ຖານພະແນກ ວິທະຍາສາດ ແລະ ເຕັກໂນໂລຊີແຂວງເຊກອງທີ່ໃຫ້ການສະໜັບສະໜູນຊ່ວຍເຫຼືອໃນຄັ້ງນີ້ ແລະ ຂໍຢືນຢັນວ່າພວກເຮົາຈະນຳເອົາວັດຖຸດັ່ງກ່າວນຳໃຊ້ໃຫ້ເປັນ ປະໂຫຍດ, ມີຜົນສຳເລັດ ແລະນຳໃຊ້ໃຫ້ຖືກເປົ້າໝາຍ.

ບົດຂ່າວ ແລະ ຮູບພາບ: ນ.ລັດສະໝີ ກົມມະສິດ

 

ສ້າງຂື້ນໃນ ປີ 2015. ສະຫງວນລິຂະສິດໂດຍ: ພະແນກວິທະຍາສາດ ແລະ ເຕັກໂລຊີແຂວງເຊກອງ, ຕັ້ງຢູ່ບ້ານ ໃໝ່ຫົວເມືອງ, ເມືອງ ລະມາມ, ແຂວງ ເຊກອງ, ໂທຣ:(+856)38211646, ແຟກ:(+856)38211646
Powered by Joomla 1.7 Templates