​ຍີນ​ດີ​ຕ້ອນ​ຮັບ ​ສູ່​ເວັບ​ໄຊ ພະ​ແນກ ວິ​ທະ​ຍາ​ສາດ ແລະ ເຕັກ​ໂນ​ໂລ​ຊີ ແຂວງ ເຊກອງ

ວັນອະນຸລັກສັດນໍ້າ-ສັດປ່າ ແຫ່ງຊາດ

00165 ໃນຕອນເຊົ້າຂອງວັນທີ 12 ກໍລະກົດ 2019 ພະແນກ ວິທະຍາສາດ ແລະ ເຕັກໂນໂລຊີ ແຂວງເຊກອງ ຊຶ່ງນໍາໂດຍ ທ່ານ ລຳ​ພັນ ແກ້ວມ​ະ​ຫາ​ໄຊ ຮອງຫົວໜ້າພະແນກວິທະຍາ ສາດ ແລະ ເຕັກໂນໂລຊີແຂວງ​ພ້ອມ

ພະນັກງານ-ລັດຖະກອນພາຍໃນພະແນກ ໄດ້ເຂົ້າຮ່ວມໃນພິທີ​ປ່ອຍ​ປາ​ລົງສູ່ແມ່ນ້ຳເຊກອງ (​ວັງ​ສະ​ຫງວນ ບ້ານ ​ແກ້ງ​ຫລວງ ເມືອງລະມາມ ແຂວງເຊກອງ) ເນື່ອງໃນໂອກາດ ສະ​ເຫຼີມ​ສະຫຼອງວັນອະນຸລັກສັດນໍ້າ-ສັດ​ປ່າ ແຫ່ງຊາດ ວັນ​ທີ 13 ກໍ​ລະ​ກົດ ປີ2019, ​ພາຍ​ໃຕ້​ການ​ເປັນ​ປະ​ທານ​ຮ່ວມ​ ຂອງທ່ານ ເຫລັກໄຫລ ສີວິໄລ ຄະນະປະຈໍາພັກແຂວງ, ຮອງເຈົ້າແຂວງ-ແຂວງເຊກອງ ແລະ ທ່ານ ຂັນຕີ ສີລະວົງສາກໍາມະການພັກແຂວງ, ເລຂາພັກເມືອງ, ເຈົ້າເມືອງ-ເມືອງລະມາມ, ມີບັນດາທ່ານ ຄະນະນຳຂອງແຂວງ, ຄະນະນຳຂອງເມືອງລະມາມ, ພະນັກງານ-ລັດຖະກອນໃນຈັດຕັ້ງພັກ-ລັດຂັ້ນຕ່າງໆຂອງແຂວງ ແລະ ເມືອງ ຕະຫຼອດຮອດພໍ່ແມ່ປະຊາຊົນ ບັນດາເຜົ່າຂອບເຂດບ້ານໃກ້ຄຽງວັງສະຫງວນ ເຂົ້າຮ່ວມຢ່າງເປັນຂະບວນຟົດຟື້ນ.

         ຈຸດ​ປະ​ສົງ ເພື່ອເປັນການປູກຈິດສຳນຶກ​ໃຫ້ອະນຸຊົນ, ເຍົາວະຊົນ ລູກຫຼານຜູ້ເກີດໃໝ່ໃຫຍ່ລຸນ, ຊາວໜຸ່ມໄວໜຸ່ມ, ພະນັກງານ-ລັດຖະກອນ, ທະຫານ, ຕຳຫຼວດ ຕະຫຼອດຮອດ ພໍ່ແມ່ປະຊາຊົນບັນດາເຜົ່າ ມີສະຕິຮັກສາ, ຫວງແຫນສັດນ້ຳ-ສັດປ່າ; ທັງເປັນການລະດົມໃຫ້ທົ່ວປວງຊົນເຂົ້າຮ່ວມການຄຸ້ມຄອງປົກປັກ ຮັກສາ, ພັດທະນາ ແລະ ນຳໃຊ້ສັດນ້ຳສັດປ່າ ແນໃສ່ເຮັດໃຫ້ປະຊາກອນສັດນ້ຳ-ສັດປ່າ ໃຫ້ນັບມືມີຄວາມອຸດົມສົມບູນ ແລະ ກາຍເປັນທ່າແຮງໃຫ້ແກ່ການ ຄ້ຳປະກັນດ້ານສະບຽງອາຫານ ແລະ ໂພສະນາການ ປັບປຸງຊິວິດການເປັນຢູ່ຂອງປະຊາຊົນໃຫ້ນັບມື້ດີຂຶ້ນ.

ໃນພິ​ທິ​ດັ່ງ​ກ່າວ​ ທ່ານ ຂັນຕີ ສີລະວົງສາກໍາມະການພັກແຂວງ, ເລຂາພັກເມືອງ, ເຈົ້າເມືອງ-ເມືອງລະມາມ ໄດ້ກ່າວວ່າ: ພັກ ແລະ ລັດຖະບານໄດ້ກໍານົດ ເອົາວັນທີ 13 ກໍລະກົດ ຂອງທຸກໆ ປີເປັນວັນອະນຸລັກສັດນໍ້າ-ສັດປ່າ ແຫ່ງຊາດ ໂດຍໄດ້ອອກກົດໝາຍວ່າດ້ວຍການປະມົງ ສະບັບເລກທີ 03/ສພຊ, ລົງວັນທີ 9 ກໍລະກົດ 2009 ເຄື່ອງມືໃນການຄຸ້ມຄອງສັດນ້ຳ-ສັດປ່າ ເພື່ອໃຫ້ການຄຸ້ມຄອງ ແລະ ນ້ຳໃຊ້ມີຄວາມຍືນຍົງຕະຫຼອດໄປ ເຊິ່ງໄລຍະຜ່ານມາຄະນະພັກ-ອໍານາດ ການປົກຄອງທຸກຂັ້ນໄດ້ມີຄວາມ ພະຍາຍາມປະກອບສ່ວນເຂົ້າຂະບວນການອະນຸລັກສັດນໍ້າ-ສັດປ່າ ອອກລະບຽບ ແລະ ມາດຕະການຕ່າງໆໃນການຄຸ້ມຄອງ ເພື່ອບໍ່ໃຫ້ມີການລັກລອບຫາປາໂດຍນຳໃຊ້ເຄື່ອງມືແບບດັບສູນ ຫຼື ຫາປາໃນລະດູການວາງໄຂ່. ມາຮອດປະຈຸບັນນີ້ ເຫັນວ່າສັດນໍ້າບາງຊະນິດຫຼຸດຫນ້ອຍຖອຍລົງ ສາຍເຫດ ຍ້ອນການເພີ່ມຂື້ນຂອງພົນລະເມືອງ ແລະ ການຂະຫຍາຍຕົວທາງດ້ານເສດຖະກິດ-ສັງຄົມ, ຄວາມຮຽກຮ້ອງຕ້ອງການ ອາຫານຈາກທໍາມະຊາດ, ການໃຊ້ອຸປະກອນ ທີ່ທັນສະໄໝທີ່ຜິດຕໍ່ລະບຽບກົດໝາຍເຊັ່ນ: ການໃຊ້ໝໍ້ຊັອດໄຟຟ້າ, ການໃຊ້ຢາເບື່ອ ແລະ ການວາງລະເບິດເປັນຕົ້ນ ເຊິ່ງໄດ້ສ້າງຄວາມເສຍ ຫາຍ ແລະ ດັບສູນຕໍ່ສັດນ້ຳຫຼາຍຊະນິດ.

       ໃນ​ຕ່ອນ​ທ້າຍ​ທ່ານ ເຫຼັກ​ໄຫລ​ ສີ​ວິ​ໄລ ຍັງ​ໄດ້​ໂອ​ລົມ​ຕໍ່​ກອງ​ປະ​ຊຸມ ເຊິ່ງ​ທ່ານ​ໄດ້​ເໜັ້ນ​ໜັກ​ໃຫ້​ທຸກໆ​ຄົນ​ບໍ່​ວ່າ​ຈະ​ແມ່ນພະ​ນັກ​ງານ, ທະ​ຫານ, ​ຕຳ​ຫລວດ, ​ພໍ່​ແມ່​ປະ​ຊາ​ຊົນ ​ເຂົ້າ​ໃຈ​ ແລະ ​ເປັນ​ເຈົ້າ​ການ​ໃນ​ການ​ປົກ​ປັກ​ຮັກ​ສາ​ສັດ​ນ້ຳ-ສັດ​ປ່າ ​ຢຸດ​ຕິ​ການ​ນຳ​ໃຊ້ອຸປະກອນ ທີ່ທັນສະໄໝ​ທີ່​ສ່ຽງ​ຕໍ່​ກ​ານ​ດັບ​ສູນ​ຂອງ​ສັດ ທີ່ຜິດຕໍ່ລະບຽບ ກົດໝາຍເຂົ້າ​ໃນ​ການ​ລ່າ ເໜັ້ກ​ໜັກ​ໃຫ້​ພະ​ແນກ​ການ, ບ້ານ​ ແລະ ເຈົ້າ​ໜ້າ​ທີ​ທີ່​ກ່ຽວ​ຂ້ອງເປັນ​ເຈົ້າ​ການ​ໃນ​ການ​ປະ​ຕິ​ບັດ​ວິ​ໃນ​ຕໍ່​ຜູ້ລະ​ເມີດລະ​ບຽບ​ກົດ​ໝາຍ ປຸກ​ລະ​ດົມ​ປູກ​ຈິດ​ສຳ​ນຶກ​ໃຫ້​ເຂົາ​ເຈົ້າ​ຮູ້​ອະ​ນຸ​ລັກ​ສັດ​ນ້ຳ ແລະ ສັດ​ປ່າ​ໃຫ້​ຍືນ​ຍົງ​ຄູ່​ກັບ​ລູກຫຼານ​ຄົນ​ລຸ້ນຫຼັງ​ຕະຫຼອດ​ໄປ. ຊັນນິດພັນປາທີ່ນຳມາປ່ອຍໃນຄັ້ງນີ້ປະກອບມີ 2 ຊະນິດຄື: ປາປາກ ແລະ ປາກິນຫຍ້າ ລວມທັງໝົດ 12.500 ໂຕ

ບົດ​ຂ່າວ ແລະ ຮູບ​ພາບ: ບຸດ​ດີ​ ພົມ​ພິ​ທັກ

 

ສ້າງຂື້ນໃນ ປີ 2015. ສະຫງວນລິຂະສິດໂດຍ: ພະແນກວິທະຍາສາດ ແລະ ເຕັກໂລຊີແຂວງເຊກອງ, ຕັ້ງຢູ່ບ້ານ ໃໝ່ຫົວເມືອງ, ເມືອງ ລະມາມ, ແຂວງ ເຊກອງ, ໂທຣ:(+856)38211646, ແຟກ:(+856)38211646
Powered by Joomla 1.7 Templates