​ຍີນ​ດີ​ຕ້ອນ​ຮັບ ​ສູ່​ເວັບ​ໄຊ ພະ​ແນກ ວິ​ທະ​ຍາ​ສາດ ແລະ ເຕັກ​ໂນ​ໂລ​ຊີ ແຂວງ ເຊກອງ

ຫ້ອງການ ວຕ ເມືອງລະມາມຈັດຝຶກອົບຮົມ ວຽກງານງານຄຸ້ມຄອງ ແລະ ພັດທະນາໄອທີ

ໃນຕອນເຊົ້າວັນທີ 19 ກັນຍາ 2019 ຜ່ານ​ມາ​ນີ້ ຢູ່ທີ່ສະໂມສອນຫ້ອງວ່າການເມືອງ ລະມາມ ໄດ້ຈັດ ກອງປະຊຸມຝຶກອົບຮົມວຽກງານຄຸ້ມຄອງ ແລະ ພັດ ທະນາໄອທີໃຫ້ແກ່ພະນັກງານ ໃນຂະແໜງການ ຕ່າງໆອ້ອມ

ຂ້າງເມືອງ, ໃຫ້ກຽດເຂົ້າຮ່ວມຂອງ ທ່ານ ຄຳໄລ ປັນຍາຄູນ ຄະນະປະຈຳ ພັກເມືອງ, ຮອງເຈົ້າເມືອງໆລະມາມ, ທ່ານ   ສີຖັນ ແກ້ວສະຫວ່າງ ຫົວໜ້າຫ້ອງການວິທະຍາສາດ ແລະ ເຕັກໂນໂລຊີ ເມືອງ, ມີບັນດາທ່ານ​ຕ່າງໜ້າ ຈາກຂະແໜງການຕ່າງໆອ້ອມຂ້າງເມືອງທັງໝົດ 28 ທ່ານ, ຍິງ 9 ທ່ານ.

 ຈຸດປະສົງແມ່ນເພື່ອຍົກລະດັບຄວາມຮູ້ຄວາມສາມາດໃຫ້ແກ່ບຸກຄະລາກອນຢູ່ອົງການຈັດຕັ້ງຂັ້ນຕ່າງໆຂອງ ເມືອງກ່ຽວກັບການ ຄຸ້ມຄອງນຳໃຊ້ເຕັກໂນໂລຊີຄອມພິວເຕີ ແລະ ພັດທະນາໄອທີ ໃຫ້ມີຄວາມເຂັ້ມແຂງຂຶ້ນ ໂດຍສະເພາະແມ່ນ ການຕິດຕັ້ງ, ບຳລຸງຮັກສາ ແລະ ການແກ້ໄຂບັນຫາຕ່າງໆ ເຊັ່ນ: ການຕິດຕັ້ງວີນ​ໂດ ແລະ ແກ້ໄຂບັນຫາໂປຣແກຣມ, ການແບ່ງປັນຂໍ້ມູນ ແລະ ນຳໃຊ້​ປີນ​ເຕີ​ຮ່ວມ​ກັ​ນຜ່ານ​ລະ​ບົບ​ເນັດ​ເວີກ ແລະ ອື່ນໆ ແນ່ໃສການຈັດຕັ້ງປະຕິບັດວຽກງານວິຊາສະເພາະ ຂອງຂະແໜງການຂັ້ນເມືອງ ມີຄວາມສະດວກ, ວ່ອງໄວ, ແລະ ທັນສະໄໝຂຶ້ນ, ທັງເປັນການເຜີຍແຜ່ພາລະ ບົດບາດ ​ຂອງ​ຫ້ອງ​ການວິທະຍາສາດ ແລະ ເຕັກໂນໂລຊີ​ເມືອງ . ການຝຶກອົບຮົມຄັ້ງນີ້ໃຊ້ເວລາ 1 ວັນ​ເຕັມ, ໂດຍມີ​ວິ​ທະ​ຍາ​ກອນ​ຈາກ ພວ​ຕ ແຂວງ ຮ່ວມ​ກັບ​ວິ​ທະ​ຍາ​ກອນ​​ຫ້ອງ​ການ ວ​ຕ​ ເມືອງ ເປັນ​ຜູ້​ຖ່າຍ​ທອດ​ຄວາມ​ຮູ້ ​ແລະ ເຊິ່ງປະກອບດ້ວຍ 3 ຫົວບົດທີ່ເອົາ ມາຈັດຝຶກຄື: ການຕິດຕັ້ງວີນ​ໂດ, ການສ້າງ ບັນຊີສົ່ງ-ຮັບ ຈົດໝາຍທາງເອເລັກໂຕຣນິກ (e-mail), ການຕິດຕັ້ງເນັດເວີກ, ແບ່ງປັນຂໍ້ມູນ ແລະ ນຳໃຊ້ປີນ​ເຕີຮ່ວມກັນ​ຜ່ານ​ລະ​ບົບ​ເນັດ​ເວີກ ແລະ ຍັງໄດ້ເຜີຍ​ແຜແນະນໍາ 3 ໂປຣແກຣມຄື: ໂປຣແກຣມຄຸ້ມຄອງເອກະສານ (ຂາເຂົ້າ-ຂາອອກ) “E-document System”, ໂປຣແກຣມລະບົບຄຸ້ມຄອງ-ບໍລິຫານຊີວະປະຫວັດ ພະນັກງານ “E-Personnel System” ແລະ ໂປຣແກຣມຄຸ້ມ​ຄອງ​ຊັບ​ສີນ “E-Inventory System” ອີກ​ດ້ວຍ.

         ໂອກາດທ້າຍ ປະທານ ກອງປະຊຸມ ທ່ານ ຄຳໄລ ປັນຍາຄູນ ຄະນະປະຈຳ ພັກເມືອງ, ຮອງເຈົ້າເມືອງລະມາມ ​ໄດ້ໃຫ້ກຽດໂອ້ລົມຕໍ່ກອງປະຊຸມເຊິ່ງທ່ານ ໄດ້ສະແດງຄວາມຍ້ອງຍໍຊົມເຊີຍຕໍ່ນັກສຳມະນາກອນຈາກຂະແໜງການຕ່າງໆທີ່ເອົາໃຈໃສ່ປະຕິບັດໂມງເວລາຢ່າງເຂັ້ມງວດ ແລະ ເຂົ້າຮ່ວມຢ່າງສຸດກົກສຸດປາຍ ແລະ ທ່ານຍັງ​ໄດ້ຮຽກຮ້ອງມາຍັງ ນັກສໍາມະນາກອນທັງໝົດ ຈົ່ງນໍາໃຊ້ຄວາມຮູ້ ແລະ ປະສົບການທີ່ໄດ້ຈາກການຝຶກອົບຮົມໃນຄັ້ງນີ້ ໄປໝູນໃຊ້ເຂົ້າໃນວຽກງານຕົວຈິງຂ​ອງ​ຕົນ ແລະຜັນຂະຫຍາຍໃຫ້ເກີດດອກອອກຜົນ ເຮັດໃຫ້ການຈັດຕັ້ງປະຕິບັດວຽກງານໃນຂະແໜງການມີຄວາມສະດວກ ແລະ ວ່ອງໄວຂື້ນ.

                                                       ຮູບ​ພາບ ​ແລະ ບົດ​ຂ່າວ: ບຸດ​ດີ ພົມ​ພິ​ທັກ


ສ້າງຂື້ນໃນ ປີ 2015. ສະຫງວນລິຂະສິດໂດຍ: ພະແນກວິທະຍາສາດ ແລະ ເຕັກໂລຊີແຂວງເຊກອງ, ຕັ້ງຢູ່ບ້ານ ໃໝ່ຫົວເມືອງ, ເມືອງ ລະມາມ, ແຂວງ ເຊກອງ, ໂທຣ:(+856)38211646, ແຟກ:(+856)38211646
Powered by Joomla 1.7 Templates