​ຍີນ​ດີ​ຕ້ອນ​ຮັບ ​ສູ່​ເວັບ​ໄຊ ພະ​ແນກ ວິ​ທະ​ຍາ​ສາດ ແລະ ເຕັກ​ໂນ​ໂລ​ຊີ ແຂວງ ເຊກອງ

ສ້າງຄວາມເຂັ້ມແຂງດ້ານໄອທີໃຫ້ພະນັກງານ ຂອງເມືອງ ທ່າແຕງ

A000165 ໃນວັນທີ 19-21 ມິຖຸນາ 2019 ຜ່ານມານີ້ພະແນກ ວິທະຍາສາດ ແລະ ເຕັກໂນໂລຊີແຂວງ ໄດ້ຈັດຝຶກ ອົບຮົມການຄຸ້ມຄອງ ແລະ ນໍາໃຊ້ເຕັກໂນໂລຊີ ຄອມພິວເຕີຂັ້ນພື້ນຖານ ໃຫ້ແກ່ພະນັກງານໃນຂະ ແໜງການ

ຕ່າງໆອ້ອມຂ້າງເມືອງທ່າແຕງfຢູ່ທີ່ສະໂມສອນຫ້ອງວ່າການເມືອງ ທ່າແຕງໃຫ້ກຽດເປັນປະທານຮ່ວມ ແລະ ກ່າວເປີດພິທີໂດຍ: ທ່ານ ລໍາພັນ ແກ້ວມະຫາໄຊ ຮອງຫົວໜ້າພະແນກວິທະຍາສາດ ແລະ ເຕັກໂນໂລຊີແຂວງ ແລະ ທ່ານ ວິລະພັນ ທໍາມະວົງສາ ກຳມະການພັກເມືອງ, ຫົວໜ້າຫ້ອງການວິທະຍາສາດ ແລະ ເຕັກໂນໂລຊີ ເມືອງ, ມີບັນດາທ່ານຕາງໜ້າຈາກຂະແໜງການຕ່າງໆອ້ອມຂ້າງເມືອງເຂົ້າຮ່ວມການຝຶກອົບຮົມໃນຄັ້ງນີ້ທັງໝົດ 51ທ່ານ, ຍິງ 30ທ່ານ.

ຈຸດປະສົງຂອງການຝຶກອົບຮົມໃນຄັ້ງນີ້ ແມ່ນເພື່ອຍົກລະດັບຄວາມຮູ້ຄວາມສາມາດໃຫ້ແກ່ບຸກຄະ ລາກອນຢູ່ອົງການຈັດຕັ້ງຂັ້ນຕ່າງໆຂອງເມືອງກ່ຽວກັບການຄຸ້ມຄອງ ແລະ ນຳໃຊ້ເຕັກໂນໂລຊີຄອມພິວເຕີ ໃຫ້ມີຄວາມເຂັ້ມແຂງຂຶ້ນໂດຍສະເພາະແມ່ນ ການຕິດຕັ້ງ, ບຳລຸງຮັກສາ ແລະ ການແກ້ໄຂບັນຫາຕ່າງໆ ເຊັ່ນ: ການບຳລຸງຮັກສາຮາດແວ, ການຕິດຕັ້ງ ແລະ ແກ້ໄຂບັນຫາໂປຣແກຣມ, ການອັບເດດ ແລະ ປ້ອງກັນໄວຣັດ, ການແບ່ງປັນຂໍ້ມູນ ແລະ ນຳໃຊ້ຊັບພະຍາກອນຮ່ວມກັນ, ການນຳໃຊ້ເຄື່ອງມືໃນອັອບຟິດ ແລະ ອື່ນໆ ແນ່ໃສ່ຮັບປະກັນເຮັດໃຫ້ການບໍລິການ ແລະ ການຈັດຕັ້ງປະຕິບັດວຽກງານວິຊາສະເພາະ ຂອງຂະແໜງການຂັ້ນເມືອງ ມີຄວາມສະດວກວ່ອງໄວ, ແລະ ທັນສະໄໝຂຶ້ນ, ການນຳໃຊ້ອຸປະກອນເຕັກໂນໂລຊີຄອມພິວເຕີ ມີປະສິດທິພາບ ແລະ ປະສິດທິຜົນສູງສຸດ, ປະຢັດຄ່າໃຊ້ຈ່າຍໃນການບຳລຸງຮັກສາ,ອີກດ້ານໜຶ່ງກໍ່ ເປັນການເຜີຍແຜ່ພາລະບົດບາດ ພະແນກວິທະຍາສາດ ແລະ ເຕັກໂນໂລຊີ, ກະຊວງ ກໍຄືແນວທາງນະໂຍບາຍຂອງພັກ-ລັດ ກ່ຽວກັບວຽກງານເຕັກໂນໂລຊີ -ຂໍ້ມູນຂ່າວສານ ລົງສູ່ຮາກຖານຂັ້ນເມືອງ ມີຄວາມກວ້າງຂວາງ ແລະ ເລິກເຊິ່ງຂຶ້ນຕື່ມ. ການຝຶກອົບຮົມຄັ້ງນີ້ໃຊ້ເວລາ 3ວັນ, ເຊິ່ງປະກອບດ້ວຍ 5 ຫົວບົດທີ່ເອົາ ມາຈັດຝຶກຄື: ການບໍາລຸງຮັກສາ, ການຕິດຕັ້ງ, ອັບເດດ ແລະ ການແກ້ໄຂບັນຫາລະບົບຄອມພິວເຕີ, ການນໍາໃຊ້ເຄື່ອງມືໃນໄມໂຄຣຊ໋ອບອ໋ອບຟິກ, ການສ້າງ ບັນຊີສົ່ງ-ຮັບຈົດໝາຍທາງເອເລັກໂຕຣນິກ (e-mail),ການຕິດຕັ້ງເນັດເວີກ, ແບ່ງປັນຂໍ້ມູນ ແລະ ນຳໃຊ້ຊັບພະຍາກອນຮ່ວມກັນ, ການຊອກຄົ້ນຂໍ້ມູນຜ່ານອິນເຕີ ເນັດ ແລະ ຍັງໄດ້ແນະນໍາ 2 ໂປຣແກຣມຄື: ລະບົບຄຸ້ມຄອງ-ບໍລິຫານການນັບຄະແນນສຽງເລືອກຕັ້ງe-Voting System” ແລະ ລະບົບຄຸ້ມຄອງ-ບໍລິຫານ ຊີວະປະຫວັດ ພະນັກງານ“e-Personnel System”

ນະໂອກາດດຽວກັນນີ້ ທ່ານ ລຳພັນ ແກ້ວມະຫາໄຊ ຮອງຫົວໜ້າພະແນກວິທະຍາສາດ ແລະ ເຕັກໂນໂລຊີແຂວງ ທັງເປັນຫົວໜ້າຄະນະຊີ້ນຳ-ນຳພາ ການຈັດຕັ້ງຝຶກອົບຮົມໄດ້ຕີລາຄາ ແລະ ລາຍງານໂດຍຫຍໍ້ ມາຍັງ ທ່ານ ສຸລະພົນ ໝື່ນວິເສດ ຫົວໜ້າພະແນກວິທະຍາສາດ ແລະ ເຕັກໂນໂລຊີແຂວງ ແລະ ທ່ານ ແສງລາຕີ ຫຼອມຍະເດດ ຄະນະປະຈໍາພັກເມືອງ ຫົວໜ້າຄະນະຈັດຕັ້ງເມືອງທ່າແຕງ ເຊິ່ງເປັນຄະນະປະທານໃນພິທີປິດ ແລະ ມອບໃບຢັ້ງຢືນໃນຄັ້ງນີ້ ໂດຍທ່ານລາຍງານໃຫ້ຮູ້ວ່າ ບັນດານັກວິທະຍາກອນຈາກແຂວງໄດ້ພະຍາຍາມ ແລະ ຕັ້ງອົກຕັ້ງໃຈຖ່າຍຖອດບວິຊາຄວາມຮູ້, ບົດຮຽນ ແລະ ປະສົບການຕ່າງໆ ໃຫ້ແກ່ນັກສຳມະນາກອນ ດ້ວຍຄວາມຮັບຜິດຊອບສູງ ແລະ ສຸດຄວາມສາມາດ ພ້ອມດຽວກັນນີ້ນັກສຳມະນາກອນທີ່ເຂົ້າຮ່ວມຝຶກອົບຮົມໃນຄັ້ງນີ້ກໍ່ໄດ້ໃຫ້ການ ຮ່ວມມືເປັນຢ່າງດີ, ມີລະບຽບວິໄນ, ປະຕິບັດໂມງເວລາຢ່າງເຂັ້ມງວດ, ພະຍາຍາມຖອດຖອນ, ແລກປ່ຽນບົດຮຽນ, ມີຄຳຖາມເຈາະຈີ້ມບັນຫາທີ່ພົບຕົວຈິງ ໃນການປະຕິບັດວຽກງານຂອງຕົນ ເພື່ອຍາດແຍ່ງເອົາຄວາມຮູ້ ໄດ້ເຮັດໃຫ້ການຝຶກມີບັນຍາກາດທີ່ຟົດຟື້ນ, ສ້າງສັນ ແລະ ມີຄວາມສາມັກຄີພາຍໃນໜັກແໜ້ນ.

         ໂອກາດທ້າຍນີ້ ທ່ານ ສຸລະພົນ ໝື່ນວິເສດ ຫົວໜ້າພະແນກວິທະຍາສາດ ແລະ ເຕັກໂນໂລຊີແຂວງ ແລະ ທ່ານ ແສງລາຕີ ຫຼອມຍາເດດ ຄະນະປະຈຳ ພັກເມືອງ, ຫົວໜ້າຄະນະຈັດຕັ້ງເມືອງ ຄະນະປະທານປິດກອງປະຊຸມ ກໍ່ໄດ້ໃຫ້ກຽດມອບໃບຢັ້ງຢືນໃຫ້ແກ່ນັກສຳມະນາກອນ ພ້ອມທັງໃຫ້ກຽດໂອ້ລົມຕໍ່ກອງປະ ຊຸມເຊິ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ນັກສຳມະນາກອນຈາກຂະ   ແໜງການຕ່າງໆທີ່ເອົາໃຈໃສ່ປະຕິບັດໂມງເວລາຢ່າງເຂັ້ມງວດ ແລະ ເຂົ້າຮ່ວມຢ່າງສຸດ ກົກສຸດປາຍໃນຕະຫລອດໄລຍະ 3ວັນ ແລະ ຂໍຮຽກຮ້ອງມາຍັງ ນັກສໍາມະນາກອນທັງໝົດ ຈົ່ງນໍາໃຊ້ຄວາມຮູ້ ແລະ ປະສົບການທີ່ໄດ້ຈາກການຝຶກອົບຮົມໃນຄັ້ງນີ້ ໄປໝູນໃຊ້ເຂົ້າໃນວຽກງານຕົວຈິງທີ່ຕົນໄດ້ຮັບຜິດຊອບສູງ ແລະ ຖ່າຍທອດຄວາມຮູ້ທີ່ໄດ້ຈາກການຝຶກໃນຄັ້ງນີ້ຖ່າຍຖອດສູ່ເພື່ອນຮ່ວມງານຂອງຕົນ ເພື່ອເຮັດໃຫ້ ການຈັດຕັ້ງປະຕິບັດວຽກງານໃນຂະແໜງການມີຄວາມສະດວກ ແລະ ວ່ອງໄວຂື້ນ. ຕ່ອນທ້າຍວາລະກອງປະຊຸມ ເວລາ 4:00 ທ່ານ ແສງລາຕີ ຫຼອມຍະເດດ ຄະນະປະຈໍາພັກເມືອງ, ຫົວໜ້າຄະນະຈັດຕັ້ງເມືອງທ່າແຕງ ກໍ່ໄດ້ກ່າວປິດກອງປະຊຸມຝຶກອົບຮົມສໍາມະນາໃນຄັ້ງນີ້ຢ່າງເປັນທາງການ.

ບົດ​ຂ່າວ ແລະ ຮູບພາບ: ນ ລັດ​ສະ​ໝີ ກົມ​ມະ​ສິດ

A000166 A000167 A000168 A000169 A000170 A000171 A000172 A000173 A000174 A000175 A000176 A000177 A000178 A000179 A000180 A000181 A000182 A000183

 

ສ້າງຂື້ນໃນ ປີ 2015. ສະຫງວນລິຂະສິດໂດຍ: ພະແນກວິທະຍາສາດ ແລະ ເຕັກໂລຊີແຂວງເຊກອງ, ຕັ້ງຢູ່ບ້ານ ໃໝ່ຫົວເມືອງ, ເມືອງ ລະມາມ, ແຂວງ ເຊກອງ, ໂທຣ:(+856)38211646, ແຟກ:(+856)38211646
Powered by Joomla 1.7 Templates