​ຍີນ​ດີ​ຕ້ອນ​ຮັບ ​ສູ່​ເວັບ​ໄຊ ພະ​ແນກ ວິ​ທະ​ຍາ​ສາດ ແລະ ເຕັກ​ໂນ​ໂລ​ຊີ ແຂວງ ເຊກອງ

ສ້າງຄວາມເຂັ້ມແຂງການຄຸ້ມຄອງແລະການສ້າງ ເອກະສານທາງການໃຫ້ແກ່ພະນັກງານຫ້ອງການ ວຕ ຂັ້ນເມືອງຂອງແຂວງເຊກອງ

ພະແນກວິທະຍາສາດແລະເຕັກໂນໂລຊີແຂວງເຊກອງ ໄດ້ຈັດກອງປະຊຸມເຜີຍແຜ່ດຳລັດ ສະບັບເລກທີ 239/ລບ ວ່າດ້ວຍ ເອກະສານທາງການ ແລະ ຄຳ

ແນະນຳກ່ຽວກັບການຈັດຕັ້ງປະຕິບັດດຳລັດວ່າດ້ວຍເອກະສານທາງການສະບັບເລກທີ 02/ພນ ໃຫ້ບັນດາຂະ ແໜງການອ້ອມ ຂ້າງພະແນກ ແລະ ຫ້ອງການວິທະຍາສາດ ແລະເຕັກໂນໂລຊີເມືອງ ໃນຕອນເຊົ້າວັນທີ 18 ມີຖຸນາ 2020 ນີ້, ຢູ່ທີ່ຫ້ອງປະຊຸມພະແນກ ວິທະຍາສາດ ແລະ ເຕັກໂນໂລຊີແຂວງ ພາຍໃຕ້ການເປັນ ປະທານຂອງ ທ່ານ ລໍາພັນ ແກ້ວມະຫາໄຊ ຮອງຫົວໜ້າພະແນກວິທະຍາສາດ ແລະ ເຕັກໂນໂລຊີແຂວງ, ​ ເຂົ້າຮ່ວມໃນຄັ້ງນີ້ມີຫົວ​ໜ້າ​ຫ້ອງ​ການ ແລະຮອງຫົວໜ້າຫ້ອງການ ວຕ ເມືອງ 4 ເມືອງ, ຫົວໜ້າ, ຮອງ​ຫົວ​ໜ້າ​ຫ້ອງ​ການ ແລະຫົວໜ້າຂະແໜງ, ຮອງຫົວໜ້າຂະແໜງ ຕະຫຼອດຮອດພະນັກງານວິ​ຊາ​ການພາຍ​ໃນພະແນກ ເຂົ້າຮ່ວມທັງ​ໝົດ 14 ທ່ານ ຍິງ 4 ທ່ານ.

 ຈຸດປະສົງຂອງການຝຶກອົບຮົມດັ່ງກ່າວແມ່ນເພື່ອສ້າງຄວາມເຂັ້ມແຂງໃຫ້ແກ່ພະນັກງານໃນຂະແໜງວິທະຍາສາດ ແລະເຕັກໂນໂລຊີທັງຂັ້ນແຂວງແລະເມືອງ ກ່ຽວກັບ ການສ້າງເອກະສານທາງການ ແນໃສ່ຮັບປະກັນຄວາມຖືກຕ້ອງສອດຄ່ອງຕາມລະບຽບຫຼັກການວາງອອກ, ສ້າງໃຫ້ພະນັກງານມີຄວາມຊໍານິຊໍານານງານ ມີຄວາມເປັນ ເຈົ້າການຂື້ນຕື່ມໃນການຮ່າງເອກະສານທາງການ ເປັນຕົ້ນ: ການກຳນົດເນື້ອໃນຫົວຂໍ້ເອກະສານ, ການໃສ່ຂະໜາດຕົວອັກສອນ, ກໍານົດໄຍລະຫ່າງຈາກຂອບເຈົ້ຍ(ຊ້າຍ-ຂວາ, ເທິງ-ລຸ່ມ), ການໃສ່ຫົວຂໍ້, ໃສ່ເລກທີ, ການຄຸ້ມຄອງເອກະສານທາງການ ແລະອື່ນໆ. ເຊີ່ງເອກະສານທີ່ນໍາມາເຜີຍແຜ່ໃນຄັ້ງນີ້ມີຄື: ດໍາລັດ ວ່າດ້ວຍເອກະ ສານທາງການ ສະບັບເລກທີ 239/ລບ, ລົງວັນທີ 13 ສິງຫາ 2015 ແລະຄຳແນະນຳ ສະບັບເລກທີ 02/ພນ, ລົງວັນທີ 05 ເມສາ 2016 ກ່ຽວກັບການ ຈັດຕັ້ງປະຕິບັດດຳລັດວ່າດ້ວຍເອກະສານທາງການ ໃຫ້ກຽດນຳສະເໜີໂດຍທ່ານ ທິດສຸວັນ ມິດສຸເກມ ຫົວໜ້າຫ້ອງການບໍລິຫານ-ຈັດຕັ້ງ ແລະທ່ານ ທິນໃຈ ເທບໄກສອນ ຮອງຫົວໜ້າຫ້ອງການບໍລິຫານ-ຈັດຕັ້ງ.ໃນກອງປະຊຸມຍັງໄດ້ມີການແລກປ່ຽນຄໍາຄິດຄໍາເຫັນເຊີ່ງກັນ ແລະກັນລະຫວ່າງຜູ້ແທນນໍາອີກ ຊື່ງເຕັມໄປດ້ວຍ ບັນຍາກາດຟົດຟື້ນ.

ໂອກາດດັ່ງກ່າວໃນ​ຕອນ​ທ້າຍ ທ່ານ ລໍາພັນ ແກ້ວມະຫາໄຊ ຮອງຫົວໜ້າພະແນກວິທະຍາສາດ ແລະ ເຕັກໂນໂລຊີແຂວງເຊກອງ ໄດ້ໂອ້ລົມຕໍ່ກອງປະຊຸມເຜີຍແຜ່ຄັ້ງນີ້, ໂດຍທ່ານໄດ້ເນັ້ນໜັກໃຫ້ບັນດາທ່ານເຂົ້າຮ່ວມຈົ່ງເອົາໃຈໃສ່ສືບຕໍ່ສຶກສາຄົ້ນຄວ້າເນື້ອໃນເອກະສານໃຫ້ລະອຽດຈະແຈ້ງຕື່ມ ເພື່ອສາມາດກຳແໜ້ນໃນການຈັດຕັ້ງປະຕິ ບັດວຽກງານສ້າງ ແລະການຄຸ້ມຄອງເອກະສານທາງການ ພາຍໃນຂະແໜງການຕົນ ໃຫ້ໄປຕາມດຳລັດສະບັບເລກທີ 239/ລບ ແລະບົດແນະນຳ 02/ພນ ຢ່າງເຂັ້ມງວດ ຮັບປະກັນເຮັດໃຫ້ການສ້າງເອກະສານທາງການຖືກຕ້ອງ ແລະສອດຄ່ອງກັບລະບຽບຫຼັກການດັ່ງກ່າວ ການເຜີຍແຜ່ໃຊ້ເວລາໜຶ່ງຄາບເຊົ້າ ແລະ ປິດລົງໃນເວລາ 11:45 ໂມງ ຂອງວັນດຽວກັນດ້ວຍຜົນສໍາເລັດອັນຈົບງາມ.

                                                                                                                           ບົດ​ຂ່າວ: ຄ່ຽມແກ້ວ ແກ້ວດວງມະນີ

ສ້າງຂື້ນໃນ ປີ 2015. ສະຫງວນລິຂະສິດໂດຍ: ພະແນກວິທະຍາສາດ ແລະ ເຕັກໂລຊີແຂວງເຊກອງ, ຕັ້ງຢູ່ບ້ານ ໃໝ່ຫົວເມືອງ, ເມືອງ ລະມາມ, ແຂວງ ເຊກອງ, ໂທຣ&ແຟັກ:(+856)38211646, ແຟກ:(+856)38211646
Powered by Joomla 1.7 Templates