​ຍີນ​ດີ​ຕ້ອນ​ຮັບ ​ສູ່​ເວັບ​ໄຊ ພະ​ແນກ ວິ​ທະ​ຍາ​ສາດ ແລະ ເຕັກ​ໂນ​ໂລ​ຊີ ແຂວງ ເຊກອງ

ພວຕ ແຂວງ ລົງກວດທຽບໝໍ້ນັບໄຟຟ້າ, ໝໍ້ ແທກນ້ຳປະປາ ແລະ ຫົວຈ່າຍນໍ້າມັນເຊື້ອໄຟ

ໃນວັນທີ 2 ມີຖຸນາ 2020 ພະແນກວິທະຍາສາດ ແລະ ເຕັກໂນໂລຊີແຂວງເຊກອງຮ່ວມກັບລັດວິສາ ຫະກິດໄຟຟ້າລາວສາຂາແຂວງເຊກອງ, ລັດວິສາຫະ

ກິດນ້ຳປະປາແຂວງ ແລະຄະນະກໍາມະການກວດກາມາດຕະຖານ ແລະວັດແທກຂັ້ນແຂວງ ໄດ້ລົງເຄື່ອນໄຫວຕິດ ຕາມກວດກາ, ກວດທຽບມາດຕະຖານໝໍ້ນັບໄຟຟ້າ ແລະ ໝໍ້ແທກນ້ຳປະປາ ຢູ່ພາຍໃນເມືອງລະມາມ ໂດຍມີທ່ານ ເຫຼັກໄຫຼ ສີວິໄລ ຄະນະປະຈຳພັກແຂວງ, ຮອງເຈົ້າແຂວງໆເຊກອງ, ທັງເປັນປະທານຄະນະກຳມະ ການຄຸ້ມຄອງມາດຕະຖານ ແລະວັດແທກຂັ້ນແຂວງ, ມີທ່ານ ສຸລະພົນ  ໝື່ນວິເສດ ຫົວໜ້າພະແນກ ວິທະຍາສາດ ແລະເຕັກໂນໂລຊີແຂວງເຂົ້າຮ່ວມ ຮອງປະທານ ທັງເປັນກອງເລຂາຄະນະກຳມະການດັ່ງກ່າວ.

 

 ໃນໂອກາດນີ້ ທ່ານ ສຸລະພົນ ໝື່ນວິເສດ ຫົວໜ້າພະແນກວິທະຍາສາດ ແລະເຕັກໂນໂລຊີແຂວງເຊກອງ ກ່າວວ່າ: ການລົງເຄື່ອນໄຫວຕິດຕາມກວດກາ, ກວດທຽບ ມາດຕະຖານໝໍ້ນັບກະແສໄຟຟ້າ ແລະ ໝໍ້ແທກນໍ້າປະປາ ຄັ້ງນີ້ ແມ່ນເປັນການກວດທຽບລະບົບປົກກະຕິປະຈຳປີ ແລະ ວິທີການກວດແມ່ນປະຕິບັດຕາມ ລະບຽບຫຼັກການຂອງກະຊວງວິທະຍາສາດ ແລະ ເຕັກໂນໂລຊີ ກໍຄືກົມມາດຕະຖານ ແລະ ວັດແທກວາງອອກ, ທັງນີ້ກໍ່ເພື່ອຕິດຕາມກວດກາ, ສອບທຽບ ແລະ ກວດຄືນອຸປະກອນ ວັດແທກປະເພດໝໍ້ນັບໄຟຟ້າ ແລະ ໝໍ້ແທກນ້ຳປະປາທີ່ໄດ້ຕິດຕັ້ງນຳໃຊ້ໃນສຳນັກງານອົງການພັກ-ລັດ, ເອກະຊົນ ແລະຄົວເຮືອນພາຍໃນ ເມືອງລະມາມ ເພື່ອຢັ້ງຢືນຄວາມຊັດເຈນຂອງອຸປະກອນດັ່ງກ່າວຕໍ່ຜູ້ຊົມໃຊ້ ເຮັດໃຫ້ສັງຄົມມີຄວາມຍຸຕິທຳ, ປອດໄພ ແລະມີຄວາມເປັນເອກະພາບໃນທົ່ວປະເທດ ບົນພື້ນຖານຄວາມຖືກຕ້ອງຕາມລະບຽບ, ຫຼັກການ ແລະ ມາດຕະຖານ ຂອງພາກພື້້ນ ແລະ ສາກົນ ແນໃສ່ຊຸກຍູ້ສົ່ງເສີມການບໍລິການທີ່ມີຄຸນນະ ພາບ, ແທດເໝາະກັບສະພາບຄວາມເປັນຈິງບໍ່ໃຫ້ມີການເອົາລັດເອົາປຽບ ລະຫວ່າງຜູ້ໃຫ້ບໍລິການ ແລະ ຜູ້ໃຊ້ບໍລິການ ເຮັດໃຫ້ການຊົມໃຊ້ອຸປະກອນວັດແທກ ພາຍໃນແຂວງເຊກອງ ມີຄວາມຍຸຕິທຳ.

  ໃນຄະນະດຽວກັນນີ້ ທ່ານ ວຽງໄຊ ວໍລະສິງ ຮອງຫົວໜ້າພະແນກວິທະຍາສາດ ແລະ ເຕັກໂນໂລຊີແຂວງຜູ້ຊີ້ນຳວຽກງານດັ່ງກ່າວໄດ້ລາຍງານວ່າ: ຜ່ານການຈັດຕັ້ງປະຕິບັດໜ້າວຽກຕົວຈິງຢູ່ພາກສະໜາມ ກ່ຽວກັບການກວດສອບ, ກວດທຽບໝໍ້ແທກນ້ຳປະປາ ທີ່ຕິດຕັ້ງໃນສຳນັກງານຂອງພັກ-ລັດ, ເອກະຊົນ ແລະ ຄົວເຮືອນຂອງປະຊາຊົນ ຢູ່ພາຍໃນເມືອງລະມາມໃນ 17 ບ້ານ, ເຊິ່ງມີຈຳນວນທັງໝົດ 4.965 ໜ່ວຍ ຊຶ່ງເລີ່ມແຕ່ວັນທີ 11-22 ພຶດສະພາ 2020; ຊຶ່ງຫຼັກການກວດສອບແມ່ນນຳໃຊ້ຖັງຜອງບໍລິມາດຂະໜາດ 10-50 ລິດ ກວດສອບ 2 ຂັ້ນຕອນ, ກຳນົດເອົາຈຸດເປົ້າໝາຍຈຸດລະ 100 ໜ່ວຍ, ກວດຊຸ່ມເອົາ 3% ຂອງແຕ່ລະຈຸດ ແລະຈະໄດ້ກວດກາທຽບໝໍ້ແທກນ້ຳທັງໝົດຈຳນວນ 151 ໜ່ວຍ ຈາກຈຳນວນ 4.965 ໜ່ວຍ ຊຶ່ງໃນນີ້ ມີ 4.957 ໜ່ວຍທີ່ຖືກຕ້ອງຕາມມາດຕະ ຖານແຫ່ງຊາດກຳນົດໄວ້ ແລະ ມີຈຳນວນ 8 ໜ່ວຍ ທີ່ບໍ່ໄດ້ມາດຕຖານ ຈຶ່ງໄດ້ມອບໃຫ້ລັດວິສາຫະກີດນ້ຳປະປາ ປ່ຽນຖ່າຍໝໍ້ແທກນ້ຳປະປາຄືນໃໝ່ ໃຫ້ແກ່ປະຊາຊົນໂດຍບໍ່ໄດ້ເສຍຄ່າ.

  ສຳລັບການກວດສອບທຽບຫົວຈ່າຍນ້ຳມັນເຊື້ອໄຟ ແມ່ນໄດ້ເລີ່ມແຕ່ວັນທີ 16-26 ມີນາ 2020 ຜ່ານມາ ຊຶ່ງກວດສອບຕົວຈິງ 3 ເມືອງ ຄື: ເມືອງລະມາມ, ທ່າແຕງ ແລະ ດາກຈຶງ ລວມມີ 29 ປ້ຳ, 160 ຫົວຈ່າຍ, ສາມາດກວດສອບຕົວຈິງໄດ້ 106 ຫົວຈ່າຍ ໃນນັ້ນມີການຄາດເຄື່ອນ 32 ຫົວຈ່າຍ ແລະໄດ້ດັດປັບໃຫ້ຢູ່ໃນເກນມາດຕະຖານທີ່ລັດກຳນົດໄວ້, ໃນຈຳນວນ 54 ຫົວຈ່າຍ ແມ່ນໄດ້ປິດບໍລິການຊົ່ວຄາວ. ນອກນີ້ ຍັງຈະໄດ້ສືບຕໍ່ລົງກວດສອບໝໍ້ນັບໄຟຟ້າ ທີ່ເມືອງລະມາມ ຕື່ມອີກ; ຊຶ່ງເລີ່ມແຕ່ວັນທີ 2 -25 ມີຖຸນາ ນີ້, ຊຶ່ງມີໝໍ້ນັບກະແສໄຟຟ້າທັງໝົດ ຈໍານວນ 8.435 ໜ່ວຍ, ກວດຊຸ່ມ 3% ມີຈໍານວນທັງໝົດ 276 ໜ່ວຍ, ລວມມີ 66 ໝູ່ບ້ານ ໃຫ້ສຳເລັດຕາມຄາດໝາຍທີ່ວາງໄວ້.

 

                                                                                                                                                                 ບົດຂ່າວ: ລັດສະໝີ ກົມມະສິດ 

                                                                                                                                   ຮູບພາບ: ບຸດດີ ພົມພິທັກ

 

ສ້າງຂື້ນໃນ ປີ 2015. ສະຫງວນລິຂະສິດໂດຍ: ພະແນກວິທະຍາສາດ ແລະ ເຕັກໂລຊີແຂວງເຊກອງ, ຕັ້ງຢູ່ບ້ານ ໃໝ່ຫົວເມືອງ, ເມືອງ ລະມາມ, ແຂວງ ເຊກອງ, ໂທຣ:(+856)38211646, ແຟກ:(+856)38211646
Powered by Joomla 1.7 Templates