​ຍີນ​ດີ​ຕ້ອນ​ຮັບ ​ສູ່​ເວັບ​ໄຊ ພະ​ແນກ ວິ​ທະ​ຍາ​ສາດ ແລະ ເຕັກ​ໂນ​ໂລ​ຊີ ແຂວງ ເຊກອງ

ພວຕ ແຂວງເຜີຍແຜ່ເອກະສານແຈ້ງການເຝົ້າ ລະວັງການແຜ່ລະບາດຂອງພະຍາດອັກເສບ ປອດຈາກເຊື້ອ COVID-19

ໃນຕອນເຊົ້າຂອງວັນທີ 26ມີນາ 2020 ຜ່ານມານີ້, ທີ່ຫ້ອງປະຊຸມພະແນກ ວິທະຍາສາດ ແລະ ເຕັກໂນ ໂລຊີ ແຂວງເຊກອງ,   ໄດ້ຈັດຕັ້ງ ເຜີຍແຜ່-ເຊື່ອມ ຊຶມບັນດາເອກະສານ ແຈ້ງການສໍາຄັນຕ່າງໆໃຫ້ກຽດ ເຂົ້າຮ່ວມເປັນ

ປະທານໂດຍທ່ານສຸລະພົນ ໝື່ນວິເສດເລຂາໜ່ວຍພັກ, ຫົວໜ້າພະແນກ ວິທະຍາສາດ ແລະ ເຕັກໂນໂລຊີແຂວງ.

    ຈຸດປະສົງໃນການເຜີຍແຜ່-ເຊື່ອມຊຶມໃນຄັ້ງນີ້ ແມ່ນເພື່ອເຮັດໃຫ້ສະຫາຍສະມາຊິກພັກ,ພະນັກງານ-ລັດຖະກອນ ພາຍໃນພະແນກວິທະຍາສາດ ແລະ ເຕັກໂນໂລຊີແຂວງ ໄດ້ຮັບຮູ້ ແລະເຂົ້າໃຈຢ່າງເລິກເຊິ່ງເຖິ່ງ ເຫດການໃນປະຈຸບັນ ຕໍ່ສະພາບການລະບາດຂອງພະຍາດອັກເສບປອດຈາກເຊື້ອ COVID-19ໃນຫຼາຍປະເທດ ໄດ້ຂະຫຍາຍເປັນວົງກວ້າງ, ສຶບຕໍ່ມີກໍລະນີຜູ້ຕິດເຊື້ອ ແລະເສຍຊິວິດເພີ່ມຂື້ນໃນແຕ່ລະວັນ, ໂດຍອົງການອະນາ ໄມໂລກໄດ້ປະເມີນວ່າCOVID-19 ແມ່ນມີຄວາມສ່ຽງສູງສຸດ ແລະປະກາດເປັນການລະບາດໃຫຍ່ທົ່ວໂລກ, ຮຽກຮ້ອງໃຫ້ທຸກປະເທດຍົກລະດັບເຝົ້າລະວັງ ແລະ ໂຕ້ຕອບ, ເຖິງປະຈຸບັນ ສປປ ລາວ ບໍ່ມີກໍລະນີຜູ້ຕິດເຊື້ອCOVID-19 ກໍ່ຕາມ ແຕ່ຖືວ່າຍັງເປັນຄວາມສ່ຽງສູງ ທີ່ຈະຂະຫຍາຍເປັນບໍລິເວນກວ້າງ, ຍ້ອນວ່າປະເທດໃກ້ຄຽງຂອງພວກເຮົາໄດ້ມີການລະບາດແລ້ວ ແລະຍັງມີຜູ້ເດີນທາງມາຈາກປະເທດທີ່ມີການລະບາດເຂົ້າ-ອອກ ສປປ ລາວ ເປັນຕົ້ນ: ນັກລົງທຶນ,ພະນັກງານຊ່ຽວຊານ,ກໍາມະກອນໂຄງການກໍ່ສ້າງ, ນັກຮຽນ-ນັກສຶກສາ,ຊາວຄ້າຂາຍ ແລະອື່ນໆ.ດັ່ງນັ້ນ, ເພື່ອແນໃສ່ເປັນພິເສດ ເຮັດໃຫ້ສະຫາຍສະມາຊິກພັກ, ພະນັກງານລັດຖະກອນໄດ້ເຊື່ອມຊຶມ, ກຳແໜ້ນ,ຮູ້ດູແລຮັກສາປ້ອງກັນສຸຂະພາບ,ຕິດຕາມກວດກາສຸຂະພາບຂອງຕົນເອົງ ແລະ ຄອບຄົວ, ຫຼີກລ້ຽງການໂຮມຊຸມນຸມ, ຫຼີກລ້ຽງໄປໃນສະຖານທີ່ຜູ້ຄົນແອອັດທີ່ອາດກໍ່ໃຫ້ເກີດມີຄວາມສ່ຽງຕໍ່ການນໍາເຊື້ອພະຍາດມາສູ່ຕົນເອງ ແລະຄອບຄົວນໍາອີກ.

      ນະໂອກາດນີ້ໃຫ້ກຽດເຜີຍແຜ່ ແລະເຊື່ອມຊຶມເອກະສານດັ່ງກ່າວ ໂດຍທ່ານ ສຸລະພົນ ໝື່ນວິເສດ ເລຂາໜ່ວຍພັກ, ຫົວໜ້າພະແນກວິທະຍາສາດ ແລະເຕັກໂນໂລຊີ ເຊິ່ງມີປະກອບມີ 3 ເອກະສານ ຄື: ແຈ້ງການຂອງທ່ານເຈົ້າແຂວງ-ແຂວງເຊກອງ ສະບັບເລທີ 10/ຈຂ.ຊກ, ລົງວັນທີ 23 ມີນາ 2020ວ່າດ້ວຍການປະຕິບັດສະເຫຼີມສະຫຼອງບຸນປີໃໝ່ລາວປະຈໍາ ພສ 2563 ແລະແຈ້ງການ ຂອງພະແນກສາທາລະນະສຸກແຂວງ, ສະບັບເລກທີ 88/ສທຂ, ລົງວັນທີ 23 ມີນາ 2020 ວ່າດ້ວຍການຍົກລະດັບມາດຕະການຄວບຄຸມການລະບາດຂອງພະຍາດອັກເສບປອດຈາກເຊື້ອ COVID-19 ສໍາລັບຜູ້ທີ່ເດີນທາງເຂົ້າມາ ສປປ ລາວ ແລະຄໍາແນະນໍາເພີ່ມເຕີມການຈໍາກັດບໍລິເວນຢູ່ສະຖານທີ່ພັກເຊົາຂອງຕົນເອງ ໃນໄລຍະ 14 ວັນ ຂອງພະແນກສາທາລະນະສຸກແຂວງ ສະບັບເລກທີ 89/ສທຂ, ລົງວັນທີ 23 ມີນາ 2020.

  ນະໂອກາດທ້າຍນີ້ ທ່ານປະທານກອງປະຊຸມ ຍັງໄດ້ໃຫ້ກຽດໂອ້ລົມຕໍ່ກອງປະຊຸມເຊິ່ງໃນໂອກາດນີ້ທ່ານໄດ້ສະແດງຄວາມເປັນຫ່ວງເປັນໄຍ ແລະ ຮຽກຮ້ອງໃຫ້ ສະຫາຍສະມາຊິກພັກ, ພະນັກງານລັດຖະກອນທຸກສະຫາຍຈົ່ງເອົາໃຈໃສ່ຕິດຕາມຂໍ້ມູນຂ່າວສານທາງການ, ມີສະຕິຈຳແນກຈະແຈ້ງໃນການບໍລິໂພກສື່ສັງຄົມອອນລາຍ ແລະພ້ອມກັນປະຕິບັດຕາມການແນະນຳຂອງການຈັດຕັ້ງພັກ-ລັດຢ່າງເຂັ້ມງວດ ເພື່ອປະກອບສ່ວນຕອບຕ້ານ ແລະ ຈຳກັດເຊື້ອພະຍາດອັກເສບປອດຈາກເຊື້ອ COVID-19 ບໍ່ໃຫ້ ແຜ່ລະບາດອອກໄປກວ້າງຂວາງໃນ ສປປ ລາວ ກໍຄືທ້ອງຖິ່ນ.

    ເຂົ້າຮ່ວມພິທີໃນຄັ້ງນີ້ມີ ຄະນະພະແນກ, ຫົວໜ້າຫ້ອງການ, ຮອງຫົວໜ້າຫ້ອງການ, ຫົວໜ້າຂະແໜງ, ຮອງຫົວໜ້າຂະແໜງ, ພ້ອມດ້ວຍພະນັກງານ- ລັດຖະ ກອນທັງໝົດເຂົ້າຮ່ວມ 13 ທ່ານ,​ຍິງ 4 ທ່ານ.

ບົດ​ຂ່າວ ແລະ ຮູບພາບ: ນ. ລັດສະໝີ ກົມມະສິດ


ສ້າງຂື້ນໃນ ປີ 2015. ສະຫງວນລິຂະສິດໂດຍ: ພະແນກວິທະຍາສາດ ແລະ ເຕັກໂລຊີແຂວງເຊກອງ, ຕັ້ງຢູ່ບ້ານ ໃໝ່ຫົວເມືອງ, ເມືອງ ລະມາມ, ແຂວງ ເຊກອງ, ໂທຣ:(+856)38211646, ແຟກ:(+856)38211646
Powered by Joomla 1.7 Templates