​ຍີນ​ດີ​ຕ້ອນ​ຮັບ ​ສູ່​ເວັບ​ໄຊ ພະ​ແນກ ວິ​ທະ​ຍາ​ສາດ ແລະ ເຕັກ​ໂນ​ໂລ​ຊີ ແຂວງ ເຊກອງ

ກອງປະຊຸມໃຫ່ຍຄັ້ງທີ I ຂອງໜ່ວຍພັກຮາກ ຖານ ພະແນກວິທະຍາສາດ ແລະ ເຕັກໂນໂລຊີ

ໃນຕອນເຊົ້າຂອງວັນທີ 04 ມີນາ 2020 ຜ່ານມານີ້, ທີ່ຫ້ອງປະຊຸມພະແນກວິທະຍາສາດ ແລະ ເຕັກໂນ ໂລຊີແຂວງໄດ້ຈັດພິທີເປິດກອງປະຊຸມໃຫ່ຍຄັ້ງທີ I ຂອງໜ່ວຍພັກຮາກຖານພະແນກວິທະຍາສາດ ແລະ ເຕັກໂນ

ໂລຊີຂື້ນໂດຍການເຂົ້າຮ່ວມເປັນປະທານຂອງສະຫາຍ ເຫລັກໄຫລ ສີວິໄລ ຄະນະປະຈໍາພັກແຂວງ, ຮອງເຈົ້າ ແຂວງ-ແຂວງເຊກອງ,ສະຫາຍ ສຸລະພົນ ໝື່ນວິເສດ ເລຂາໜ່ວຍພັກ, ຫົວໜ້າພະແນກວິທະຍາສາດ ແລະ ເຕັກ ໂນໂລຊີ ແລະສະຫາຍ ນ. ເພັດດາວອນ ວາດສະຫງ່າ ຮອງຫົວໜ້າຄະນະຈັດຕັ້ງແຂວງ,ມີຄະນະພັກຮາກຖານ,ຄະນະໜ່ວຍພັກຮາກຖານ ອ້ອມຂ້າງ, ສະມາຊິກພັກສົມບູນ, ສໍາຮອງແລະແຂກຖືກເຊີນເຂົ້າຮ່ວມທັງໜົດ 33 ສະຫາຍ,ຍິງ 6 ສະຫາຍ.

  ໃນກອງປະຊຸມສະຫາຍສຸລະພົນ ໝື່ນວິເສດ ເລຂາໜ່ວຍພັກ ຫົວໜ້າພະແນກວິທະຍາສາດ ແລະຕັກໂນໂລຊີ ແຂວງເຊກອງ, ກໍໄດ້ຂຶ້ນຜ່ານບົດລາຍງານການເມືອງ ແລະບົດສໍາຫຼວດການນໍາພາລວມຂອງຄະນະໜ່ວຍພັກຊຸດເກົ່າ ເປັນເອກະພາບກັນຕີລາຄາດ້ານດີ,ດ້ານອ່ອນ,ຂໍ້ຄົງຄ້າງ,ສາເຫດແລະບົດຮຽນໃນການຊີ້ນໍາ-ນໍາພາ,ການຈັດຕັ້ງປະຕິບັດ ຕະຫຼອດໄລຍະ 5 ປີຜ່ານມາຄືແຕ່ປີ (2015-2019) ແລະ ຮັບຮອງເອົາທິດທາງ, ແຜນການ 5 ປີນັບແຕ່ປີ 2020 ຮອດປີ 2024 ຊຶ່ງມີເນື້ອໃນຕົ້ນຕໍລຸ່ມນີ້:

+ໜຶ່ງ:ຍຶດໝັ້ນ ແລະ ເສີມຂະຫຍາຍແນວທາງປ່ຽນແປງໃໝ່ຮອບດ້ານທີ່ມີຫຼັກການຂອງພັກຢ່າງໜັກແໜ້ນ, ໂດຍນຳເອົາຜົນສຳເລັດຂອງການຄົ້ນຄວ້າພັດທະນາ ວິທະຍາສາດ, ເຕັກໂນໂລຊີ ແລະ ນະວັດຕະກຳ ມາໝູນໃຊ້ຕາມທ່າແຮງທ້ອງຖິ່ນເພື່ອປະກອບສ່ວນເຂົ້າ​ໃນ​ການພັດທະນາເສດຖະກິດ-ສັງຄົມຂອງແຂວງ ກ້າວຫຼຸດພົ້ນ ອອກຈາກແຂວງທຸກຍາກ ແລະ ດ້ອຍພັດທະນາ;

+ ສອງ: ຄົ້ນຄວ້າຜັນຂະຫຍາຍ, ມະຕິ, ຄຳສັ່ງ ແລະ ທິດນໍາຂອງອົງຄະນະພັກແຂວງ ແຕ່ລະໄລຍະ ແລະ ມະຕິກອງປະຊຸມໃຫຍ່ຄັ້ງທີ Iຂອງໜ່ວຍພັກຮາກຖານ ໃຫ້ເປັນແຜນວຽກລະອຽດ ແລະ ຈັດຕັ້ງປະຕິບັດໃຫ້ມີປະສິດທິຜົນສູງ;

+ສາມ: ກໍ່ສ້າງໜ່ວຍພັກປອດໃສ, ເຂັ້ມແຂງ ​ແລະໜັກແໜ້ນ, ມີຄວາມສາມາດໃນການນຳພາສູງກວ່າເກົ່າ, ມີຄວາມເຂັ້ມແຂງທາງດ້ານການຈັດຕັ້ງ, ມີແບບແຜນນຳພາ ທີມີວິທະຍາສາດ ຕາມຫຼັກການຂອງພັກ, ໄດ້ຮັບຄວາມເຊື່ອໝັ້ນ ແລະ ສະໜັບສະໜູນຈາກກ້ອນກຳລັງມະຫາຊົນຢ່າງແຂງແຮງ;

+ສີ່: ກໍ່ສ້າງພະນັກງານໃຫ້ມີຄວາມໜັກແໜ້ນທາງດ້ານການເມືອງແນວຄິດ, ເຂັ້ມແຂງທາງດ້ານວິຊາສະເພາະ, ມີຄວາມສາມາດສູງໃນການຈັດຕັ້ງປະຕິບັດໜ້າທີ່ການ ເມືອງຂອງຕົນ ແລະ ສ້າງພະນັກງານນຳພາສືບທອດປ່ຽນແທນ, ສ້າງບັນດາອົງການຈັດຕັ້ງທີ່ຂຶ້ນກັບໜ່ວຍພັກ ໂດຍສະເພາະ 03 ອົງການຈັດຕັ້ງມະຫາຊົນ ໃຫ້ເປັນການຈັດຕັ້ງ ທີ່ເຂັ້ມແຂງ ເພື່ອຮັບປະກັນໃຫ້ໜ່ວຍພັກຮາກຖານຮັກສາໄດ້ແລະ ເສີມຂະຫຍາຍມູນເຊື້ອໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ;

+ ຫ້າ:ຄົ້ນຄວ້າ ແລະ ນໍາໃຊ້ວິທະຍາສາດ ແລະ ເຕັກໂນໂລຊີ ເຂົ້າໃນຂົງເຂດວຽກງານທີ່ທ້ອງຖິ່ນເຮົາມີທ່າແຮງ ໃຫ້ມີການຂະຫຍາຍຕົວສູງຂຶ້ນ ເພື່ອໃຫ້ວິທະຍາສາດ ແລະ ເຕັກໂນໂລຊີ ກາຍເປັນກຳລັງແຮງ, ເປັນພາຫະນະບຸກທະລຸເພື່ອຊຸກຍູ້ສົ່ງເສີມ ແລະ ປະກອບສ່ວນຢ່າງໜັກແໜ້ນເຂົ້າໃນການພັດທະນາເສດຖະກິດ- ສັງຄົມຂອງແຂວງ, ປະກອບສ່ວນເຂົ້າໃນການສ້າງປະຖົມປັດໄຈເພື່ອຫັນເປັນອຸດສາຫະກຳ ແລະ ທັນສະໄໝ ຕາມມະຕິກອງປະຊຸມໃຫຍ່ຄັ້ງທີ X ຂອງພັກ ແລະ ມະຕິກອງປະຊຸມໃຫຍ່ຄັ້ງທີ IXຂອງອົງຄະນະພັກແຂວງ.

         ໃນກອງປະຊຸມຜູ້ແທນສົມບູນຂອງໜ່ວຍພັກຮາກຖານ ພະແນກວິທະຍາສາດ ແລະ ເຕັກໂນໂລຊີ ຍັງໄດ້ໃຊ້ສິດປະຊາທິປະໄຕຂອງຕົນປ່ອນບັດຄັດເລືອກເອົາ ຄະນະພັກຊຸດໃໝ່ບົນພື້ນຖານຄວາມຖືກຕ້ອງສອດຄ່ອງກັບມາດຖານເງື່ອນໄຂທີ່ກຳນົດໄວ້ຊຶ່ງມີຜູ້ອອກຮັບສະໝັກ 05 ສະຫາຍ ແລະ ເລືອກເອົາ 03 ສະຫາຍ.

    ກອງປະຊຸມຄັ້ງປະຖົມມະລືກຂອງໜ່ວຍພັກຮາກຖານ ພະແນກວິທະຍາສາດ ແລະ ເຕັກໂນໂລຊີ ໄດ້ເປັນເອກະສັນກັນເລືອກເອົາເລຂາໜ່ວຍພັກ, ຮອງເລຂາໜ່ວຍ, ປະທານກວດກາດັ່ງນີ້: ສະຫາຍ ສຸລະພົນ ໝື່ນວິເສດ, ເປັນເລຂາໜ່ວຍພັກ; ສະຫາຍ ລໍາພັນ ແກ້ວມະຫາໄຊ ເປັນຮອງເລຂາໜ່ວຍພັກ; ສະຫາຍ ວຽງໄຊ ວໍລະສິງ ເປັນຄະນະໜ່ວຍພັກ ແລະ ປະທານກວດກາໜ່ວຍພັກ.

        ຕອນທ້າຍຂອງກອງປະຊຸມຍັງໄດ້ຮັບຟັງການໂອ້ລົມຂອງສະຫາຍ ເຫລັກໄຫລ ສີວິໄລ ຄະນະປະຈໍາພັກແຂວງ, ຮອງເຈົ້າແຂວງ - ແຂວງເຊກອງ ຊຶ່ງສະຫາຍ ໄດ້ເນັ້ນໜັກໃຫ້ຄະນະໜ່ວຍພັກຊຸດໃໝ່ຕ້ອງໄດ້ຄົ້ນຄວ້າ, ເຊື່ອມຊຶມກໍາແໜ້ນ ແລະຜັນຂະຫຍາຍແນວທາງນະໂຍບາຍ, ມະຕິຄໍາສັ່ງ, ນິຕິກໍາຕ່າງໆຂອງຂັ້ນເທິງ ກໍຄືມະຕິກອງປະຊຸມໃຫຍ່ຂອງຕົນໃຫ້ກາຍເປັນອັນລະອຽດ ແລະສອດຄ່ອງກັບສະພາບຄວາມເປັນຈິງ ແລະນໍາພາຈັດຕັ້ງປະຕິບັດໃຫ້ມີຜົນສໍາເລັດ, ເພີ່ມທະວີໃນການ ສຶກສາອົບຮົມໃຫ້ຖັນແຖວພະນັກງານສະມາຊິກພັກໃຫ້ມີຄວາມໜັກແໜ້ນທາງດ້ານການເມືອງ, ມີຄວາມເຊື່ອໝັ້ນຕໍ່ການນໍາພາຂອງພັກ, ເສີມຂະຫຍາຍຄວາມສາມັກ ຄີເປັນປຶກແຜ່ນ ແລະເຊີດຊູຈິດໃຈຮັກຊາດຮັກບ້ານເກີດເມືອງນອນໃຫ້ສູງຂຶ້ນ.

 ບົດ​ຂ່າວ: ນ. ລັດສະໝີ ກົມມະສິດ

ຮູບ​ພາບ: ບຸດ​ດີ ພົມ​ພິ​ທັກ

ສ້າງຂື້ນໃນ ປີ 2015. ສະຫງວນລິຂະສິດໂດຍ: ພະແນກວິທະຍາສາດ ແລະ ເຕັກໂລຊີແຂວງເຊກອງ, ຕັ້ງຢູ່ບ້ານ ໃໝ່ຫົວເມືອງ, ເມືອງ ລະມາມ, ແຂວງ ເຊກອງ, ໂທຣ:(+856)38211646, ແຟກ:(+856)38211646
Powered by Joomla 1.7 Templates