​ຍີນ​ດີ​ຕ້ອນ​ຮັບ ​ສູ່​ເວັບ​ໄຊ ພະ​ແນກ ວິ​ທະ​ຍາ​ສາດ ແລະ ເຕັກ​ໂນ​ໂລ​ຊີ ແຂວງ ເຊກອງ

ພິທີປະກາດໜ່ວຍພັກປອດໃສ, ເຂັ້ມແຂງ, ໜັກແໜ້ນຄັ້ງທີ II ປະຈໍາປີ2019

ໃນຕອນບ່າຍ ຂອງວັນທີ 2 ມີນາ 2020 ຜ່ານມານີ້, ໜ່ວຍພັກຮາກຖານພະແນກວິທະຍາສາດ ແລະ ເຕັກໂນໂລຊີແຂວງ ໄດ້ຈັດພິທີມອບ-ຮັບ ໃບຢັ້ງຢືນ ໜ່ວຍພັກປອດໃສ, ເຂັ້ມແຂງ,ໜັກ ແໜ້ນ ຄັ້ງທີ II ປະຈໍາປີ

2019 ໂດຍໃຫ້ກຽດເປັນປະທານຂອງ ສະຫາຍ ອ້ວນຄໍາ ທຸງໄຊ ກໍາມະການພັກແຂວງ, ຫົວໜ້າຄະນະ ຈັດຕັ້ງແຂວງ, ມີສະຫາຍ ສຸລະພົນ ໝື່ນວິເສດ ເລຂາໜ່ວຍພັກ, ຫົວໜ້າພະແນກວິທະຍາສາດ ແລະ ເຕັກໂນໂລຊີ ແຂວງເຊກອງ, ບັນດາທ່ານຕາງໜ້າຈາກຄະນະພັກຮາກຖານ, ໜ່ວຍພັກຮາກຖານອ້ອມຂ້າງແຂວງ ແລະ ແຂກຖືກເຊີນຈາກຂະແໜງ ການທີ່ກ່ຽວຂ້ອງ ຕະຫຼອດຮອດສະມາຊິກພັກສົມບູນ, ສໍາຮອງພາຍໃນ ໜ່ວຍພັກຮາກຖານພະແນກ ເຂົ້າ ຮ່ວມທັງໝົດ 25 ສະຫາຍ, ຍິງ 7 ສະຫາຍ.

         ພິທີດັ່ງກ່າວ ສະ​ຫາຍ ສຸລະພົນ ໜື່ນວິເສດ, ເລຂາໜ່ວຍພັກຮາກຖານພະແນກ ວິທະຍາສາດ ແລະ ເຕັກໂນໂລຊີແຂວງ ໄດ້ຂື້ນຜ່ານບົດສະຫຼຸບຕີລາຄາ ລວມກ່ຽວກັບການຊີ້ນໍາ-ນໍາພາ ຂອງໜ່ວຍພັກຮາກຖານພະແນກວິທະຍາສາດ ແລະ ເຕັກໂນໂລຊີແຂວງ ໃນການຈັດຕັ້ງປະຕິບັດແຜນກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນໃນໄລຍະຜ່ານມາ ໂດຍສະຫາຍເລຂາໜ່ວຍພັກໄດ້ຍົກໃຫ້ເຫັນສະພາບຈຸດພິດເສດ, ຂອບເຂດການນຳພາຂອງໜ່ວຍພັກ ແລະ ຜົນງານການ ຈັດຕັ້ງປະຕິບັດບັນດາມາດຖານເງື່ອນໄຂແຕ່ລະດ້ານ ເປັນຕົ້ນ: ວຽກງານການເມືອງ, ວຽກງານແນວຄິດ, ວຽກງານການຈັດຕັ້ງ, ແບບແຜນວິທີການນຳພາ ແລະ ດ້ານການນຳພາປະຕິບັດໜ້າທີ່ການເມືອງ ເຊິ່ງແຕ່ລະດ້ານແມ່ນບັນລຸໄດ້ຕາມມາດຖານເງື່ອນໄຂຂອງຂັ້ນເທິງ ວາງໄວ້ ພ້ອມນັ້ນ ສະຫາຍຍັງໄດ້ຍົກໃຫ້ເຫັນບາງ ດ້ານອ່ອນ, ຂໍ້ຄົງຄ້າງທີ່ຈະຕ້ອງໄດ້ສືບຕໍ່ປັບປຸງແກ້ໄຂ ແລະ ກໍຳນົດທິດທາງແຜນການໃນການກໍ່ສ້າງໜ່ວຍພັກປອດໃສ່, ເຂັ້ມແຂງ, ໜັກແໜ້ນ ໃນຕໍ່ໜ້າ, ຜ່ານການຮັບຟັງການສະຫລຸບຕີລາຄາ ບັນດາສະຫາຍຕາງໜ້າຈາກພາກສ່ວນກ່ຽວຂ້ອງ, ຄະນະພັກຮາກຖານ, ໜ່ວຍພັກຮາກຖານ ອ້ອມຂ້າງແຂວງ ແລະ ສະຫາຍສະມາຊິກພັກພາຍໃນໜ່ວຍກໍ່ເຫັນດີເອກະພາບຮັບຮອງເອົາບົດສະຫຼຸບຕີລາຄາ ແລະ ທິດທາງແຜນການໃນຕໍ່ໜ້າໜ່ວຍພັກ ຮາກຖານພະແນກ ວິທະຍາສາດ ແລະ ເຕັກໂນໂລຊີໃນຄັ້ງນີ້.

        ໃນໂອກາດດຽວກັນນີ້ ສະຫາຍ ນາງ ຂວັນໃຈ ສີສຸວົງ,ຮອງຫົວໜ້າຂະແໜງກໍ່ສ້າງພັກກໍ່ໄດ້ຂຶ້ນຜ່ານມະຕິຕົກລົງຂອງຄະນະປະຈໍາພັກແຂວງ ສະບັບເລກທີ 561/ຄຈພຂ; ລົງວັນທີ 31 ທັນວາ 2019 ວ່າດ້ວຍຮັບຮອງໜ່ວຍພັກປອດໃສ, ເຂັ້ມແຂງ ແລະໜັກແໜ້ນປະຈໍາປີ 2019 ແລະ ຮັບຮອງແຜນການກໍ່ສ້າງໜ່ວຍພັກ ປອດໃສ, ເຂັ້ແຂວງ ແລະ ໜັກແໜ້ນ ປະຈຳປີ2020ພ້ອມທັງມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ໂດຍຕາງໜ້າໃຫ້ຄະນະພັກຂັ້ນເທິງແມ່ນ ສະຫາຍ ອ້ວນຄຳ ທຸງໄຊ ກຳມະການພັກແຂວງ, ຫົວໜ້າຄະນະຈັດຕັ້ງພັກແຂວງ ເປັນຜູ້ກ່າວມອບ ແລະ ຂຶ້ນກ່າວຮັບໂດຍ ສະຫາຍ ສຸລະພົນ ໝື່ນວິເສດ ເລຂາໜ່ວຍພັກຮາກຖານພະແນກວິທະຍາສາດ ແລະ ເຕັກໂນໂລຊີ ແຂວງ.

   ໂອກາດທ້າຍນີ້ ທ່ານ ປະທານ ກໍ່ໃຫ້ກຽດມີຄໍາເຫັນໂອ້ລົມ ໂດຍໃຫ້ໜ່ວຍພັກຮາກຖານພະແນກ ວິທະຍາສາດ ແລະ ເຕັກໂນໂລຊີແຂວງ ຈົ່ງສືບຕໍ່ໃຫ້ສະຫາຍສະມາຊິກພັກ, ພະນັກງານລັດຖະກອນໄດ້ເຊື່ອມຊຶມ, ກຳແໜ້ນ ແລະ ຮັກສາໄດ້ມູນເຊື້ອ, ຄຸນງາມຄວາມດີ, ຄຸນສົມບັດສິນທຳປະຕິວັດ ແລະ ແບບແຜນການດຳລົງຊີວິດ ປະຕິບັດແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໂດຍຖືເອົາການສຶກສາອົບຮົມການເມືອງນໍາພາແນວຄິດ, ເຕົ້າໂຮມ ຄວາມສາມັກຄີສະມາຊິກພັກ-ພະນັກງານ, ປັບປຸງທາງດ້ານການຈັດຕັ້ງ ແລະ ຂະຫຍາຍພັກເປັນອັນສຳຄັນ, ດໍາເນີນຊີວິດການເມືອງ ພາຍໃນຈຸ-ໜ່ວຍ ຢ່າງເປັນປົກກະຕິ, ຕໍານິສົ່ງຂ່າວພາຍໃນພັກ, ກໍ່ສ້າງຊ່ວຍເຫຼືອເຊິ່ງກັນແລະກັນ, ປັບປຸງແບບແຜນວິທີນໍາພາ-ແບບແຜນວິທີເຮັດວຽກໃຫ້ດີຂຶ້ນກວ່າເກົ່າ,ສໍາລັບສະມາຊິກພັກ ຈົ່ງເອົາໃຈໃສ່ຝຶກຝົນຫຼໍ່ຫຼອມຕົນເອງໃຫ້ມີຄຸນສົມ ບັດສິນທໍາປະຕິວັດ ເພື່ອພ້ອມກັນປະຕິບັດໜ້າທີ່ວຽກງານໃຫ້ໄດ້ຮັບຜົນສໍາເລັດເປັນກ້າວໆ.          

ບົດ​ຂ່າວ ແລະ ຮູບ​ພາບ: ນ. ລັດສະໝີ ກົມມະສິດ

 

ສ້າງຂື້ນໃນ ປີ 2015. ສະຫງວນລິຂະສິດໂດຍ: ພະແນກວິທະຍາສາດ ແລະ ເຕັກໂລຊີແຂວງເຊກອງ, ຕັ້ງຢູ່ບ້ານ ໃໝ່ຫົວເມືອງ, ເມືອງ ລະມາມ, ແຂວງ ເຊກອງ, ໂທຣ:(+856)38211646, ແຟກ:(+856)38211646
Powered by Joomla 1.7 Templates