​ຍີນ​ດີ​ຕ້ອນ​ຮັບ ​ສູ່​ເວັບ​ໄຊ ພະ​ແນກ ວິ​ທະ​ຍາ​ສາດ ແລະ ເຕັກ​ໂນ​ໂລ​ຊີ ແຂວງ ເຊກອງ

ກອງປະຊຸມເຜີຍແຜ່ ວຽກງານຊັບສິນທາງປັນ ຍາໃຫ້ແກ່ພາກສ່ວນລັດ ແລະ ຜູ້ປະກອບການ

ໃນວັນທີ 14 ກຸມພາ 2020 ຜ່ານມານີ້, ທີ່ຫ້ອງປະ ຊຸມສະພາປະຊາຊົນ ແຂວງ ເຊກອງ ພະແນກວິທະ ຍາສາດ ແລະ ເຕັກໂນໂລຊີ ຮ່ວມກັບກົມ ຊັບສິນ ທາງປັນຍາ (ກະຊວງວິທະຍາສາດ ແລະ ເຕັກໂນໂລ ຊີ)ໄດ້ຈັດກອງປະ

ຊຸມເຜີຍແຜ່ວຽກງານຊັບສິນທາງປັນຍາ ໃຫ້ແກ່ພາກລັດ ແລະ ຜູ້ປະກອບການ ເພື່ອສ້າງຄວາມເຂັ້ມແຂງທາງດ້ານ ວິຊາການກ່ຽວກັບການຮັບຄໍາຮ້ອງ ແບບອຸດສາຫະກຳ, ເຄື່ອງໝາຍການຄ້າ, ການແຈ້ງຂໍ້ມູນລິຂະສິດ ແລະ ສິດກ່ຽວຂ້ອງກັບລິຂະສິດ ແລະ ແກ້ໄຂຂໍ້ຂັດແຍ່ງທາງຊັບສິນທາງປັນຍາໂດຍໃຫ້ກຽດເປັນປະທານຮ່ວມຂອງ ທ່ານ ປອ. ສຸລິອຸດົງ ສູນດາລາ,ຮອງລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີແລະ ທ່ານ ເຫຼັກໄຫຼ ສີວິໄລ ຄະນະປະຈຳພັກແຂວງ ຮອງເຈົ້າແຂວງ-ແຂວງເຊກອງ.

     ໂອກາດນີ້, ທ່ານ ເຫຼັກໄຫຼ ສີວິໄລ ຄະນະປະຈຳພັກແຂວງ ຮອງເຈົ້າແຂວງ-ແຂວງເຊກອງ ໄດ້ໃຫ້ກຽດ ມີຄຳເຫັນຕໍ່ກອງປະຊຸມສຳມະນາ ເພື່ອເປັນການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ຂອງຂະແໜງ ວິທະຍາສາດ ແລະ ເຕັກໂນໂລຊີ ກໍຄື ການປະຕິບັດ ກົດໝາຍວ່າດ້ວຍຊັບສິນທາງປັນຍາ ລຸ່ມກົດໝາຍທີ່ຈຳເປັນໃນການຂັບເຄື່ອນຊຸກຍູ້, ຊຸກດັນ ແຜນພັດທະນາເສດຖະກິດ-ສັງຄົມແຫ່ງຊາດເວົ້າລວມ, ເວົ້າສະເພາະ ແມ່ນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງແຂວງເຊກອງຂອງພວກເຮົາ ໃຫ້ມີການຂະຫຍາຍ ຕົວຢ່າງຕໍ່ເນື່ອງໃນການຜະລິດເປັນສິນຄ້າ ທັງສາມາດຄໍ້າປະກັນໄດ້ທາງດ້ານສະບຽງອາຫານທີ່ຍຶນຍົງ, ຄຽງຄູ່ກັບການຫັນເປັນອຸດສະຫະກຳແລະທັນສະໄໝໂດຍຕິດພັນຕາມທິດສີຂຽວເປັນມິດກັບສິ່ງແວດລ້ອມ
         ກອງປະຊຸມມື້ນີ້ ຖືເປັນຂີດໝາຍຂອງໜ່ວຍງານວິທະຍາສາດ ແລະ ເຕັກໂນໂລຊີ, ໂດຍສະເພາະ ແມ່ນວຽກງານຊັບສິນທາງປັນຍາ ຊຶ່ງຈະສ້າງຄວາມເຂັ້ມແຂງ ທາງດ້ານຄວາມຮູ້ ຄວາມເຂົ້າໃຈໃຫ້ແກ່ບັນດາພະນັກງານຂະແໜງ ການແຂວງ ແລະ ເມືອງ, ທັງພາກລັດ ແລະ ຜູ້ປະກອບການທຸລະກິດ ພາຍໃນແຂວງ ກ່ຽວກັບ ວຽກງານຊັບສິນທາງປັນຍາ. ແມ່ນເຫັນວ່າມີຄວາມສຳຄັນຫຼາຍ ຕໍ່ກັບການພັດທະນາເສດຖະກິດ-ສັງຄົມ ໃນຍຸກໂລກາພິວັດ ຊຶ່ງມັນໄດ້ສົ່ງເສີມຫົວຄິດປະດິດສ້າງ, ການຜະລິດຄິດແຕ່ງ, ເສດຖະກິດພູມປັນຍາ, ການປົກປ້ອງສິດຕໍ່ກັບຜົນປະໂຫຍດອັນຊອບທຳຂອງເຈົ້າຂອງຊັບສິນທາງປັນຍາ, ຜົນປະໂຫຍດຂອງລັດຂອງສັງຄົມ ອັນເປັນການຊຸກຊຸ້ສົ່ງເສີມໃຫ້ການຄ້າ, ການລົງທຶນ ອຳນວຍຄວາມສະດວກໃຫ້ແກ່ການສ້າງເສດຖະກິດຂອງພວກເຮົາ ໃຫ້ສາມາດແຂ່ງຂັນກັບພາກພື້ນ ແລະສາກົນໄດ້.
    ທ່ານ ປອ. ສຸລິອຸດົງ ສູນດາລາ, ຮອງລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ ໃຫ້ກຽດກ່າວເປີດກອງປະຊຸມສໍາມະນາຄັ້ງນີ້ ຊຶ່ງມີເນື້ອໃນ ບາງຕອນວ່າ: ໃນຍຸກປະຈຸບັນເປັນຍຸກການປະຕິວັດອຸດສາຫະກໍາ 4.0 ຊຶ່ງການສື່ສານ, ຄົມມະນາຄົມຂົນສົ່ງ ມີຄວາມກ້າວໜ້າ ແລະ ທັນສະໄໝຢ່າງກ້າວກະໂດດ ຊຶ່ງສາມາດເຫັນໄດ້ຈາກ ສິ່ງທີ່ໃກ້ຕົວ ເຊັ່ນ: ໂທລະສັບມືຖື ທີ່ສາມາດຕິດຕໍ່ສື່ສານກັນພຽງແຕ່ໃຊ້ປາຍນີ້ວ ກໍສາມາດຕິດຕໍ່ ແລະ ເຫັນໜ້າກັນໄດ້ ຊຶ່ງເມື່ອກ່ອນ ແມ່ນ ຈຳຕ້ອງຂຽນດ້ວຍມື ຫຼື ພິມດິດ ແລ້ວສົ່ງທາງໄປສະນີ ຫຼື ການເດີນທາງໃນເມື່ອກ່ອນ ທີ່ຕ້ອງໃຊ້ເວລາດົນນານກວ່າຈະຮອດຈະເຖິງ ເປັນຕົ້ນ. ຄວາມກ້າວໜ້າ ທີ່ກ່າວມານີ້ ລ້ວນແລ້ວແຕ່ເປັນຊັບສິນທາງປັນຍາທີ່ບົ່ງບອກເຖິງຄວາມກ້າວໜ້າທາງດ້ານວິທະຍາສາດ ແລະ ເຕັກໂນໂລຊີ, ສຳລັບການພັດທະນາວຽກງານວິທະຍາສາດ ແລະ ເຕັກໂນໂລຊີ ຢູ່ ສປປ ລາວ ເຮົາແລ້ວ, ກະຊວງວິທະຍາສາດ ແລະ ເຕັກໂນໂລຊີ ໄດ້ນຳໃຊ້ວິໄສທັດ ແລະ ຍຸດທະສາດ ການພັດທະນາວິທະຍາສາດ ແລະ ເຕັກໂນໂລຊີ ທີ່ມີ 6 ແຜນງານໃຫຍ່ ເພື່ອເຮັດໃຫ້ວິທະຍາສາດ ແລະ ເຕັກໂນໂລຊີ ຕິດພັນກັບການຜະລິດ ກາຍເປັນກຳລັງຂັບເຄື່ອນ ຂອງການພັດທະນາ ເສດຖະກິດ-ສັງຄົມ, ລົບລ້າງຄວາມທຸກຍາກ ແລະ ແກ້ໄຂຊີວິດການເປັນຢູ່ຂອງປະຊາຊົນໃຫ້ດີຂຶ້ນ. ແລະ ກອງປະຊຸມເຜີຍແຜ່ວຽກງານຊັບສິນທາງປັນຍາໃນມື້ນີ້ ກໍເປັນ 1 ໃນ 6 ແຜນງານໃຫຍ່ ຂອງວຽກງານວິທະຍາສາດ ແລະ ເຕັກໂນໂລຊີ ໃນການເຜີຍແຜ່ໂຄສະນາສ້າງຈິດສຳນຶກແລະຄວາມເຂົ້າໃຈໃນທົ່ວສັງຄົມ.
     ການຈັດກອງປະຊຸມໃນມື້ນີ້ ກໍແມ່ນນກິດຈະກຳໜຶ່ງ ຊຶ່ງຈັດຂຶ້ນເພື່ອສ້າງຄວາມເຂົ້າໃຈ ແລະ ຄວາມເຂັ້ມແຂງທາງດ້ານວິຊາການໃຫ້ແກ່ພະນັກງານຂັ້ນທ້ອງຖິ່ນ ທັງພາກລັດ ແລະ ເອກະຊົນ, ຜູ້ປະກອບການທຸລະກິດຂະໜາດນ້ອຍ ແລະ ກາງ (SME), ນັກທຸລະກິດ, ກຸ່ມຜູ້ຜະລິດ, ຊາວກະສິກອນ ເຫັນໄດ້ຄວາມສໍາຄັນ ຂອງວຽກງານຊັບສິນທາງປັນຍາ ກໍຄື ເຫັນຄວາມສຳຄັນໃນການປົກປ້ອງສິດຊັບສິນທາງປັນຍາ ໃນການປະດິດສ້າງ ແລະ ປະດິດຄິດແຕ່ງ ເພື່ອສ້າງມູນຄ່າເພີ່ມຂອງ ສິນຄ້າ ແລະ ສາມາດແຂ່ງຂັນໃນຕະຫຼາດໄດ້. ກົມຊັບສິນທາງປັນຍາ ຈະໄດ້ແນະນຳ ແລະ ສ້າງຄວາມເຂົ້າໃຈໃນການດຳເນີນງານ ກໍຄື ການແບ່ງຂັ້ນຄຸ້ມຄອງ ຂອງວຽກງານຊັບສິນທາງປັນຍາ ໃນຂັ້ນ ພະແນກວິທະຍາສາດ ແລະ ເຕັກໂນໂລຊີ ແຂວງ ເພື່ອເຮັດໃຫ້ຜູ້ປະກອບການໃນທ້ອງຖິ່ນ ສະດວກແກ່ການເຂົ້າເຖິງ ວຽກງານຊັບສິນທາງປັນຍາອີກດ້ວຍ.
   ກອງປະຊຸມເຜີຍແຜ່ຄັ້ງນີ້, ຜູ້ເຂົ້າຮ່ວມ ໄດ້ມີໂອກາດຮັບຟັງກ່ຽວກັບ ການພັດທະນາວຽກງານຊັບສິນທາງປັນຍາ ໂດຍສະເພາະ ວຽກງານສິດທິບັດ, ແບບອຸດສາ ຫະກຳ, ເຄື່ອງໝາຍການຄ້າ, ຖິ່ນກຳເນີດ, ພັນພືດໃໝ່, ລິຂະສິດ ແລະ ສິດກ່ຽວຂ້ອງກັບລິຂະສິດ ແລະ ການແກ້ໄຂຂໍ້ຂັດແຍ່ງທາງດ້ານຊັບສິນທາງປັນຍາ ຊຶ່ງຈະໃຫ້ ຮູ້ໄດ້ວ່າ ແຕ່ລະປະເພດຊັບສິນທາງປັນຍາຂອງເຮົາ ສາມາດໄດ້ຮັບການປົກປ້ອງແນວໃດພາຍໃຕ້ ກົດໝາຍວ່າດ້ວຍຊັບສິນທາງປັນຍາ ແລະ ມີມູນຄ່າເພີ່ມໄດ້ແນວໃດ ໃນການປະກອບທຸລະກິດ ແລະ ເຂົ້າໃນການພັດທະນາເສດຖະກິດສັງຄົມ ແລະວັດທະນາທໍາແບບຍືນຍົງ.
  ໂອກາດດຽວກັນນີ້, ທ່ານຮອງລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ, ກໍ່ໄດ້ມອບຄອມພິວເຕີຕັ້ງໂຕະຈຳນວນ 1 ຊຸດ ພ້ອມເຄື່ອງພິມເອກະສານ ຈໍານວນ 1 ໜ່ວຍ ໃຫ້ແກ່ ພະແນກວິທະຍາສາດ ແລະ ເຕັກໂນໂລຊີແຂວງ ແລະ ທ່ານຮອງລັດຖະມົນຕີພ້ອມດ້ວຍຄະນະກໍ່ຍັງລົງຢ້ຽມຊົມບັນດາຫົວໜ່ວຍ ທຸລະກິດນໍາອີກດ້ວຍ.

         ກອງປະຊຸມສຳມະນາໃນຄັ້ງນີ້ດຳເນີນເປັນເວລາ 1 ວັນເຕັມໂດຍມີ ທ່ານ ປອ. ນ. ຂັນລາສີ ແກ້ວບຸນພັນ,ຫົວໜ້າກົມຊັບສິນທາງປັນຍາ(ກະຊວງວິທະຍາສາດ ແລະ ເຕັກໂນໂລຊີ),ທ່ານ ສຸລະພົນ ໝື່ນວິເສດ ຫົວໜ້າພະແນກວິທະຍາສາດ ແລະ ເຕັກໂນໂລຊີ, ເຈົ້າເມືອງ, ຮອງເຈົ້າເມືອງ,ຫົວໜ້າພະແນກ, ຮອງພະແນກ ອ້ອມຂ້າງແຂວງ, ຜູ້ປະກອບການ ແລະ ພະນັກງານວິຊາການທັງສູນກາງ ແລະ ທ້ອງຖິ່ນ ເຂົ້າຮ່ວມທັງໝົດ 85 ຄົນ, ຍິງ 20 ຄົນ.

 ບົດຂ່າວ: ລັດສະໝີ ກົມມະສິດ

ຮູບພາບ: ບຸດດີ ພົມພິທັກ

    

ສ້າງຂື້ນໃນ ປີ 2015. ສະຫງວນລິຂະສິດໂດຍ: ພະແນກວິທະຍາສາດ ແລະ ເຕັກໂລຊີແຂວງເຊກອງ, ຕັ້ງຢູ່ບ້ານ ໃໝ່ຫົວເມືອງ, ເມືອງ ລະມາມ, ແຂວງ ເຊກອງ, ໂທຣ:(+856)38211646, ແຟກ:(+856)38211646
Powered by Joomla 1.7 Templates