​ຍີນ​ດີ​ຕ້ອນ​ຮັບ ​ສູ່​ເວັບ​ໄຊ ພະ​ແນກ ວິ​ທະ​ຍາ​ສາດ ແລະ ເຕັກ​ໂນ​ໂລ​ຊີ ແຂວງ ເຊກອງ

ພວຕ ເຊກອງ ເຂົ້າຮ່ວມງານວາງສະແດງວິທະ ຍາສາດ ແລະ ເຕັກໂນໂລຊີ ທົ່ວປະເທດ ທີ່ຫໍ ປະຊຸມແຫ່ງຊາດ

ງານວາງສະແດງ ວິທະຍາສາດ ແລະ ເຕັກໂນໂລຊີ ແລະ ການຮ່ວມມືພັດທະນາອຸດສາຫະກໍາເຕັກໂນ ໂລຊີລະດັບສູງ ລາວ-ຈີນ ປີ 2019 ໄດ້ຈັດຂຶ້ນໃນ ລະຫວ່າງວັນທີ 11-16 ຕຸລາ 2019 ທີ່ ຫໍປະຊຸມ ແຫ່ງຊາດ

 ໃນໂອກາດຈັດງານມະຫາກຳວິທະຍາສາດ ແລະ ເຕັກໂນໂລຊີ ປີ 2019 ເພື່ອສະເຫຼີມສະຫຼອງວັນວິທະຍາ ສາດແຫ່ງຊາດ ແລະ ວັນປະກາດເອກະລາດ ວັນທີ 12 ຕຸລາ ຢ່າງເປັນຂະບວນຟົດຟື້ນ ໃນທ່າມກາງບັນຍາກາດ ທີ່ທົ່ວພັກ, ທົ່ວກອງທັບ ແລະ ທົ່ວປວງຊົນລາວ ກໍາລັງຈັດຕັ້ງຜັນຂະຫຍາຍ ມະຕິຂອງກອງປະຊຸມໃຫ່ຍຄັ້ງທີ X ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII ນີ້ ກະຊວງວິທະຍາສາດ ແລະ ເຕັກໂນໂລຊີ ໄດ້ຮ່ວມກັບຫ້ອງການຜູ້ຕ່າງໜ້າສະພາສົ່ງເສີມການຄ້າສາກົນ ສປຈີນ ຂະແໜງ ອຸດສາຫະກໍາການ ກໍ່ສ້າງ ປະຈຳ ສປປ ລາວ, ບໍລິສັດທີ່ປຶກສາການລົງທຶນ ແລະ ກໍ່ສ້າງເຂື່ອນໄຟຟ້າຈຳກັດຜູ້ດຽວ (IHC) ແລະ ບໍລິສັດພັດທະນາວິທະຍາສາດເຕັກນິກປັກກິ່ງ ເຈີ່ນຕີ ໄດ້ຈັດງານວາງສະແດງວິທະຍາສາດ ແລະ ເຕັກໂນໂລຊີ ແລະ ກອງປະຊຸມສໍາມະນາການຮ່ວມມືພັດທະນາອຸດສາຫະກຳ ເຕັກໂນໂລຊີລະດັບສູງ ລາວ-ຈີນ ປີ 2019, ໃນລະຫວ່າງວັນທີ 11-16 ຕຸລາ 2019 ຊຶ່ງເປັນຄັ້ງທໍາອິດ ແລະ ມີຄວາມໝາຍສໍາຄັນຢ່າງຍິ່ງ ໃນການເຄື່ອນໄຫວວຽກງານວິທະຍາສາດ ເຕັກໂນໂລຊີ ແລະ ນະວັດຕະກຳຂອງປະເທດເຮົາເພື່ອກ້າວເຂົ້າສູ່ຍຸກແຫ່ງການປະຕິວັດ ອຸດສາຫະກຳຄັ້ງທີ່ 4 (ຫຼື ບາງປະເທດເອີ້ນວ່າ ຍຸກອຸດສາຫະກໍາ 4.0)

         ການຈັດງານວາງສະແດງວິທະຍາສາດ ແລະ ເຕັກໂນໂລຊີ ແລະ ກອງປະຊຸມສໍາມະນາການຮ່ວມມືພັດທະນາອຸດສາຫະກຳ ເຕັກໂນໂລຊີລະດັບສູງ ລາວ-ຈີນ ປີ 2019 ຄັ້ງນີ້ ກໍແມ່ນກິດຈະກຳໜຶ່ງ ເພື່ອສົ່ງເສີມການຖ່າຍທອດ, ການຄົ້ນຄວ້າ, ການປະດິດສ້າງ ແລະ ການນຳໃຊ້ເຕັກໂນໂລຊີ ເຂົ້າໃນການພັດທະນາເສດຖະກິດ -ສັງຄົມ ໃຫ້ມີປະສິດທິຜົນສູງ, ງານດັ່ງກ່າວຈະເປີດໂອກາດຊຸກຍູ້ສົ່ງເສີມໃຫ້ແກ່ການຮ່ວມມື ລະຫວ່າງສອງປະເທດໃນຂະແໜງວິທະຍາສາດ ແລະ ເຕັກໂນໂລຊີ, ສ້າງເວທີໃໝ່ໃຫ້ແກ່ບັນດາຂະແໜງການລັດ, ສະຖາບັນການຄົ້ນຄວ້າ ແລະ ບັນດາວິສາຫະກິດໃຫ້ເພີ່ມທະວີ ການຖ່າຍທອດ ແລະ ນໍາໃຊ້ເຕັກໂນໂລຊີທີ່ກ້າວໜ້າ ທັນສະໄໝ ຈາກ ສປ ຈີນ ເພື່ອເປັນກໍາລັງແຮງປະກອບສ່ວນເຂົ້າໃນການພັດທະນາເສດຖະກິດ-ສັງຄົົມຂອງ ສປປ ລາວ.

        ແຂວງເຊກອງ ກໍ່ໄດ້ຮັບການເຊື້ອເຊີນ ແລະ ເປັນຕົວແທນຂອງແຂວງ ນໍາໂດຍທ່ານ ເຫລັກໄຫລ ສີວິໄລ ຄະນະປະຈຳພັກແຂວງ, ຮອງເຈົ້າແຂວງ-ແຂວງ ເຊກອງ, ມີທ່ານ ສຸລະພົນ ໝື່ນວິເສດ ຫົວໜ້າພະແນກ ວິທະຍາ ສາດ ແລະ ເຕັກໂນໂລຊີແຂວງ ໃນໄລຍະຜ່ານມາວຽກງານວິທະຍາສາດ ແລະ ເຕັກໂນໂລຊີ ຂັ້ນແຂວງກໍ່ຄືການຊີ້ນໍາ-ນໍາພາຂອງຄະນະນໍາຂັ້ນແຂວງກໍ່ໃຫ້ຄວາມສໍາຄັນເອົາໃສ່ຢ່າງໃກ້ຊິດຕິດແທດ ໃນການຊຸກຍູ້ສົ່ງເສີມ ການຖ່າຍທອດ, ການຄົ້ນຄວ້າ, ການປະ ດິດສ້າງ ແລະ ການນຳໃຊ້ເຕັກໂນໂລຊີ ເພື່ອການພັດທະນາເສດຖະກິດ-ສັງຄົມແຂວງ ກໍ່ຄືການສ້າງເສດຖະກິດ ພູມປັນຍາ ໃນຂັ້ນທ້ອງຖິ່ນໃຫ້ຄວາມຂະຫຍາຍຕົວ ໃຫ້ທ່ວງທັນກັບພື້ນ ແລະ ສາກົນ,  ຄະນະດຽວກັນນັ້ນ,ງານວາງສະແດງແຂວງ ເຊກອງ ກໍ່ມີຜະລິດຕະພັນ ພູມປັນຍາຂອງແຂວງຫລາຍຊະນິດເຊັ່ນ: ໂສມ ເມືອງດາກຈືງ, ຕົ້ນອັງກາບໜູ, ເບ້ຍໝາກຈອງ ແລະ ພືດເປັນຢາ 10 ກ່ວາຊະນິດ ນໍາອີກ.

     ໃນງານມະຫາກຳວິທະຍາສາດຄັ້ງນີ້ ຈະໄດ້ຈັດຫຼາຍກອງປະຊຸມ ແລະ ກິດຈະກໍາຂຶ້ນ ຢ່າງເປັນຂະບວນຟົດຟື້ນ ຢູ່ທີ່ ຫໍປະຊຸມແຫ່ງຊາດນີ້ ເຊັ່ນ: ກອງປະຊຸມວຽກງານວິທະຍາສາດ ແລະ ເຕັກໂນໂລຊີ ທົ່ວປະເທດ ຄັ້ງທີ III, ກອງປະຊຸມສຳມະນາວິທະຍາດ, ເຕັກໂນໂລຊີ ແລະ ນະວັດຕະກໍາ ໃນຍຸກອຸດສາຫະກຳ 4.0, ກອງປະຊຸມເຜີຍແຜ່ທິດທາງການພັດທະນາ ພະລັງງານທົດແທນ ແລະ ວັດສະດຸໃໝ່ ໃນຍຸກ 4.0, ກອງປະຊຸມສໍາມະນາ ຫົວຂໍ້ “ການກຽມພ້ອມດ້ານການ ຄົ້ນຄວ້າວິທະຍາສາດ ແລະ ເຕັກໂນໂລຊີ ໃນຍຸກ 4.0”, ກອງປະຊຸມສຳມະນາກ່ຽວກັບ ການຮ່ວມມື ການຄົ້ນຄວ້າ ແລະ ໂຄງການແລກປ່ຽນທາງດ້ານວິທະຍາສາດ ແລະ ເຕັກໂນໂລຊີ, ກິດຈະກຳສ່ອງດາວ ແລະ ງານປະກວດແນວຄວາມຄິດສ້າງສັນສິ່ງປະດິດສ້າງສໍາລັບໄວໜຸ່ມ ນັກຮຽນ ນັກສຶກສາ.

    ງານວາງສະແດງວິທະຍາສາດ ແລະ ເຕັກໂນໂລຊີ ຄັ້ງນີ້ ຈະໄດ້ວາງສະແດງຜົນງານການຄົ້ນຄວ້າ ແລະ ຜະລິດຕະພັນເຕັກໂນໂລຊີ ຈາກ ສປ ຈີນ 50 ຮ້ານ ທີ່ກ່ຽວກັບເຕັກໂນໂລຊີໃນຂົງເຂດໄຟຟ້າ, ການຄ້າທາງເອເລັກໂຕຼນິກ, ການຫຸ້ມຫໍ່, ກະສິກໍາ, ຖານຂໍ້ມູນມະຫາສານ (Big Data), ການຢາ ແລະວິສະວະກໍາໂລຫະ, ຍົນບໍ່ມີຄົນຂັບ (Drone) ພ້ອມກັນນັ້ນກໍຈະມີຮ້ານວາງສະແດງຈາກບັນດາມະຫາວິທະຍາໄລ, ສະຖາບັນການຄົ້ນຄວ້າ, ບັນດາກະຊວງ, ຂະແໜງການ, ວິສາຫະກິດນະວັດຕະກໍາໃໝ (startup) ແລະ ພາກສ່ວນທຸລະກິດ ຈາກ ສປປ ລາວ ຈໍານວນ 50 ຮ້ານ.

ບົດຂ່າວ ແລະ ຮູບພາບ: ຄ່ຽມແກ້ວ ແກ້ວດວງມະນີ


 

 

 

ສ້າງຂື້ນໃນ ປີ 2015. ສະຫງວນລິຂະສິດໂດຍ: ພະແນກວິທະຍາສາດ ແລະ ເຕັກໂລຊີແຂວງເຊກອງ, ຕັ້ງຢູ່ບ້ານ ໃໝ່ຫົວເມືອງ, ເມືອງ ລະມາມ, ແຂວງ ເຊກອງ, ໂທຣ:(+856)38211646, ແຟກ:(+856)38211646
Powered by Joomla 1.7 Templates