​ຍີນ​ດີ​ຕ້ອນ​ຮັບ ​ສູ່​ເວັບ​ໄຊ ພະ​ແນກ ວິ​ທະ​ຍາ​ສາດ ແລະ ເຕັກ​ໂນ​ໂລ​ຊີ ແຂວງ ເຊກອງ

ພິທີປາຖະກະຖາເຊື່ອມຊືມ ເອກະສານສໍາຄັນ ຂອງຊາດ-ພັກ

ໃນຕອນເຊົ້າຂອງວັນທີ 12 ກັນຍາ 2019 ຜ່ານມານີ້ ທີ່ຫ້ອງປະຊຸມ ພະແນກ ວິທະຍາສາດ ແລະ ເຕັກໂນ ໂລຊີແຂວງ  ເຊກອງ, ຈັດພິທີປາຖະກະຖາເຊື່ອມ ຊຶມ ບັນດາເອກະສານ ວັນສໍາຄັນຕ່າງໆ ຂອງຊາດ ແລະ ພັກ

ໃຫ້ກຽດເຜີຍແຜ່ເຊື່ອມຊຶມ ໂດຍທ່ານ ສຸລະພົນ ໝື່ນວິເສດ ເລຂາໜ່ວຍພັກ, ຫົວໜ້າ ພະແນກວິທະຍາສາດ ແລະ ເຕັກໂນໂລຊີ.

     ການປາຖະກະຖາຄັ້ງນີ້ ແມ່ນເພື່ອເຮັດໃຫ້ສະມາຊິກພັກ, ພະນັກງານ-ລັດຖະກອນພາຍໃນ ພະແນກ ວິທະຍາ ສາດ ແລະ ເຕັກໂນໂລຊີແຂວງ ໄດ້ຮັບຮູ້ ແລະ ເຂົ້າໃຈກ່ຽວກັບຄວາມເປັນມາຂອງຊາດລາວ, ຄົນລາວ ເປັນຄົນດຸ ໝັ່ນຂະຫຍັນພຽນ,ມີມູນເຊື້ອວັດທະນະທໍາຮີດຄອງປະເພນີມາແຕ່ດົນນານ ແລະ ວິລະກໍາອັນລໍ້າເລີດທີ່ກອງທັບ ແລະ ປະຊາຊົນຫວຽດນາມ ທີ່ພ້ອມກັນຍາດມາໄດ້ສະໄໝຕໍ່ສູ້ປົດປ່ອຍຊາດກໍ່ຄືພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນປະຈຸບັນ, ທົ່ວປວງຊົນເຮົາໃຫ້ເຊິດຊູນໍ້າໃຈຮັກຊາດ, ຮັກບ້ານເກີດເມືອງນອນ, ຍົກສູງຈິດໃຈເພິ່ງຕົນເອງ, ກຸ້ມຕົນເອງ ແລະ ສ້າງ ຄວາມເຂັ້ມແຂງດ້ວຍຕົນເອງ.

         ເຜີຍແຜ່ ແລະ ເຊື່ອມຊຶມໃນຄັ້ງນີ້ມີ ທ່ານ ສຸລະພົນ ໝື່ນວິເສດ ເລຂາໜ່ວຍພັກ, ຫົວໜ້າພະແນກວິທະຍາສາດ ແລະ ເຕັກໂນໂລຊີ ຮັບ​ຜິດ​ຊອບ​ເຊື່ອມ​ຊຶມ ເອກະສານຊາດລາວ, ຄົນລາວ ແລະ ມູນເຊື້ອອັນສະຫງ່າລາສີຂອງປະຊາຊົນລາວ ແລະ ດໍາລັດຂອງນາຍົກລັດຖະມົນຕີ ສະບັບເລກທີ 314/ນຍ, ລົງວັນທີ 29 ກັນຍາ 2019 ວ່າດ້ວຍການຈັດຕັ້ງ ແລະ ເຄື່ອນໄຫວຂອງກະຊວງວິທະຍາສາດ ແລະ ເຕັກໂນໂລຊີ ແລະ ທ່ານ ວຽງໄຊ ວໍລະສິງ ຮອງຫົວໜ້າພະແນກ ຮັບ​ຜິດ​ຊອບ​ເຊື່ອມ​ຊຶມ ວັນຊາດ ສສ ຫວຽດນາມ ຄົບຮອບ 74 ປີ (2/9/1945-2/9/2019) ແລະ ວັນສ້າງຕັ້ງສະຫະພັນນັກຮົມເກົ່າແຫ່ງຊາດ ຄົບຮອບ 17 ປີ (9/9/2002-9/9/2019).

   ໃນໂອກາດທ້າຍນີ້ ທ່ານ ສຸລະພົນ ໜື່ນວິເສດ ເລຂາໜ່ວຍພັກ,​ ຫົວໜ້າພະແນກ ວິທະຍາສາດ ແລະ ເຕັກໂນໂລຊີແຂວງ ຍັງໄດ້ໃຫ້ກຽດໂອ້ລົມ ຕໍ່ກອງປະຊຸມ ທ່ານໄດ້ສະແດງຄວາມ​ຍ້ອງ​ຍໍຊົມເຊີຍມາ​ຍັງຖັນແຖວສະມາຊິກພັກ ແລະ ພະນັກງານ-ລັດຖະກອນ ພາຍໃນພະແນກ ທີ່​ຕັ້ງ​ໃຈ​ຮັບ​ຟັງ​ການ​ເຜີຍ​ແຜ່​ເຊື່ອມ​ຊຶມ​ໃນ​ຄັ້ງ​ນີ້ ແລະ ຮຽກຮ້ອງໃຫ້ບັນດາສະຫາຍສະມາຊິກພັກ, ພະນັກງານລັດຖະກອນ ທີ່ເຂົົ້າຮ່ວມນອກຈາກຮັບຟັງການເຜີຍແຜ່ເຊື່ອມຊຶມ ຈາກຄະນະພັກ , ຄະນະພະແນກແລ້ວ ຍັງຕ້ອງໄດ້ເອົາໃຈໃສ່ສຶກສາຄົ້ນຄວ້າບັນດາເນື້ອໃນເອກະສານດ້ວຍຕົນເອງເພີ່ມຕື່ມ ເພື່ອເຮັດໃຫ້ສະມາຊິກພັກ ແລະ ພະນັກງານ-ລັດ ຖະກອນ ສາມາດກຳໄດ້ບັນດາ ເນື້ອໃນລະອຽດຈະແຈ້ງ ແລະ ເຂົ້າໃຈຢ່າງເລິກເຊີ່ງໃນການຈັດຕັ້ງປະຕິບັດເຂົ້າສູ່ວຽກງານຕົວຈິງ.

ເຂົ້າຮ່ວມພິທີໃນຄັ້ງນີ້ມີ ຄະນະພະແນກ, ຫົວໜ້າຫ້ອງການ, ຮອງຫົວໜ້າຫ້ອງການ, ຫົວໜ້າຂະແໜງ, ຮອງຫົວໜ້າຂະແໜງ, ພ້ອມດ້ວຍພະນັກງານ- ລັດຖະກອນ ທັງໝົດເຂົ້າຮ່ວມ 18 ທ່ານ,​ຍິງ 5 ທ່ານ

 ບົດ​ຂ່າວ ແລະ ຮູບພາບ: ນ. ລັດສະໝີ ກົມມະສິດ


ສ້າງຂື້ນໃນ ປີ 2015. ສະຫງວນລິຂະສິດໂດຍ: ພະແນກວິທະຍາສາດ ແລະ ເຕັກໂລຊີແຂວງເຊກອງ, ຕັ້ງຢູ່ບ້ານ ໃໝ່ຫົວເມືອງ, ເມືອງ ລະມາມ, ແຂວງ ເຊກອງ, ໂທຣ:(+856)38211646, ແຟກ:(+856)38211646
Powered by Joomla 1.7 Templates