ກ່ຽວກັບ ພ.ວ.ຕ ແຂວງເຊກອງ
ແຫຼ່ງຄວາມຮູ້ທົ່ວໄປ
ຜົນງານການຄົ້ນຄ້ວາ-ພັດທະນາ
ດາວໂຫລດຂໍ້ມູນ
ບໍລິການດ້ານມາດຕະຖານ,ວັດແທກ
ພວຕແຂວງ ສະຫຼຸບຕີລາຄາການເຄື່ອນໄຫວ ຈັດຕັ້ງປະຕິບັດວຽກງານ ປະຈໍາປີ 2018 ແລະ ວາງທິດທາງແຜນການປີ 2019
ໃນວັນທີ 30 ພຶດສະພາ 2019 ນີ້ ພະແນກ ວິທະຍາສາດ ແລະ ເຕັກໂນໂລຊີ ແຂວງເຊກອງ ໄດ້ຈັດກອງ ປະຊຸມກອງປະຊຸມສະຫຼຸບຕີລາຄາ ການເຄື່ອນໄຫວຈັດຕັ້ງປະຕິບັດວຽກງານວິທະຍາສາດ ແລະ ເຕັກໂນໂລຊີ
ປະຈໍາປີ 2018 ແລະ ວາງທິດທາງແຜນການປີ 2019ຂື້ນຢູ່ທີ່ຫ້ອງປະຊຸມຊັ້ນ 3 ຫ້ອງວ່າການ ແຂວງເຊກອງ, ໂດຍການເປັນກຽດເຂົ້າຮ່ວມຂອງທ່ານ ເຫຼັກໄຫຼ ສີວິໄລ ຄະນະປະຈຳພັກແຂວງ ຮອງເຈົ້າແຂວງ-ແຂວງ ເຊກອງ, ມີທ່ານ ສຸລະພົນ ໝື່ນວິເສດ ເລຂາໜ່ວຍພັກ, ຫົວໜ້າພະແນກ ວິທະຍາສາດ ແລະ ເຕັກໂນໂລຊີແຂວງ, ມີທ່ານເຈົ້າເມືອງ-ຮອງເຈົ້າເມືອງຫົວໜ້າພະແນກ, ຮອງພະແນກ, ກົມກອງອ້ອມຂ້າງ ແຂວງ, ລັດວິສະຫະກິດ, ຫົວໜ່ວຍທຸລະກິດອ້ອມຂ້າງແຂວງ ພ້ອມດ້ວຍຄະນະພັກ, ຄະນະພະແນກ ຕະຫຼອດຮອດພະນັກງານລັດຖະກອນພາຍໃນ ພວຕ ເຂົ້າຮ່ວມທັງໝົດ 46 ທ່ານ, ຍິງ 10 ທ່ານ.
ໃນໂອກາດດຽວກັນນີ້ ທ່ານວຽງໄຊ ວໍລະສິງ ຮອງຫົວໜ້າ ພວຕ ແຂວງເຊກອງ ໄດ້ລາຍງານການຈັດຕັ້ງປະຕິບັດວຽກວິທະຍາສາດ ແລະ ເຕັກໂນໂລຊີ ປະຈໍາປີ 2018ແລະ ການວາງທິດທາງແຜນການປີ 2019ຕໍ່ກອງປະຊຸມໃຫ້ຮັບຊາບ ເຊິ່ງມີເນື້ອໃນດັ່ງນີ້: ໃນໄລຍະໜຶ່ງປີຜ່ານມາພະນັກງານ-ລັດຖະກອນທຸກຄົນ ໄດ້ເອົາໃຈໃສ່ຕັ້ງໜ້າປະຕິບັດໜ້າທີ່ວຽກງານວິຊາສະເພາະຂອງຕົນຢ່າງຫ້າວຫັນໃນດ້ານວຽກງານວິຊາສະເພາະໃນປີ 2018 ຜ່ານມາຊຶ່ງມັນສະແດງອອກຄື: ໄດ້ລົງຊຸກຍູ້ຫ້ອງການ ວຕ ເມືອງດາກຈືງ ກັບພາກສ່ວນທີ່ກ່ຽວຂ້ອງຈັດຕັ້ງສະມາຄົມກຸ່ມຜູ້ຜະລິດໂສມ ເພື່ອນໍາສະເໜີຈົດຖິ່ນກໍາເນີດ(GI) 5 ຄັ້ງ; ໄດ້ປະສານສົມທົບກັບພາກສ່ວນກ່ຽວຂ້ອງລົງກວດກາ ແລະ ສະກັດກັ້ນການຜະລິດ-ຈໍາໜ່າຍສິນຄ້າລອກຮຽນແບບເຄື່ອງໝາຍການຄ້າໂທລະສັບຍີ່ຫໍ້ (VIVO) ຈໍານວນ 2 ຄັ້ງ; ລົງກວດສອບ, ສອບທຽບໝໍ້ແທກນ້ຳປະປາທີ່ນໍາເຂົ້າມາໃໝ່ ເພື່ອຢັ້ງຢືນຄວາມຊັດເຈນດ້ານການວັດແທກມີຈໍານວນທັງໝົດ 241 ໝ່ວຍ; ລົງກວດສອບ, ສອບທຽບ ແລະ ອອກໃບຢັ້ງຢືນຫົວຈ່າຍປໍ້ານໍ້າມັນເຊື້ອໄຟມີທັງໝົດ 22 ປໍ້າ 81 ຫົວຈ່າຍ, ໃນນີ້ມີ 3 ປໍ້າ 10 ຫົວຈ່າຍທີ່ປິດໃຊ້ບໍລິການຊົ່ວຄາວທຽບໃສ່ແຜນປີ ສາມາດປະຕິບັດໄດ້ 100%; ລົງກວດສອບ, ສອບທຽບ, ໝໍ້ແທກນໍ້າປະປາທີ່ຕິດຕັ້ງໃນສໍານັກງານລັດ ແລະ ຄົວເຮືອນທັງໝົດ 3.133 ໜ່ວຍ; ໝໍ້ນັບໄຟຟ້າ 3.776 ໜ່ວຍ, ສາມາດຢັ້ງຢືນມາດຕະຖານໝໍ້ນັບໄຟຟ້າ ແລະ ໝໍ້ແທກນໍ້າປະປາຈັດຕັ້ງປະຕິບັດຕົວຈິງໄດ້ 100%;ລົງຊຸກຍູ້ຫ້ອງການວິທະຍາສາດ ແລະ ເຕັກໂນໂລຊີ 4 ຕົວເມືອງຕິດຕາມກວດທຽບຊິງຊັ່ງຕາມຫ້າງຮ້ານ ແລະ ທ້ອງຕະຫຼາດໃນທົ່ງແຂວງ 5 ຄັ້ງ ມີຈໍານວນ 421 ໜ່ວຍ ແລະ ມີ 2 ໝ່ວຍທີ່ບໍ່ໄດ້ມາດຕະຖານ ແລະ ຫົວຈ່າຍນໍ້າມັນປໍ້າອິ້ວ ຕາມຮາກຖານບ້ານ 1 ຄັ່ງ ເທົ່າກັບ 7 ຫົວຈ່າຍ; ລົງກວດສອບ, ສອບທຽບ ແລະ ອອກໃບຢັ້ງຢືນຊິງຊັ່ງວັດຖຸມີຄ່າ (ຊິງຊັ່ງຄໍາ) 1ຄັ້ງ ຈໍານວນ 8 ໜ່ວຍໃນ 8 ຮ້ານ ເຫັນວ່າໄດ້ມາດຕະຖານ 100%; ລົງກວດກາ ແລະ ເກັບກໍາຂໍ້ມູນຊິງຊັ່ງນໍ້າໜັກຂະໜາດໃຫ່ຍ 120 ໂຕນມີຈໍານວນ 2 ໜ່ວຍ ແລະ 100 ໂຕນມີຈໍານວນ 1 ໜ່ວຍ;ຈັດຕັ້ງປະຕິບັດໂຄງການອະນຸລັກ ແລະ ຂະຫຍາຍພັນໝາກຈອງບານ ແລະ ໂຄງການຄົ້ນຄວ້າຊະນິດພັນພືດເປັນຢາ 10 ຊົນເຜົ່ານໍາໃຊ້; ສໍາເລັດການຈັດຕັ້ງປະຕິບັດການວິໄຈໂສມ ແລະ ທົດລອງຫຸ້ມຫໍ່ເປັນຜະລິດຕະພັນສິນຄ້າ; ສໍາເລັດການເກັບສັງລວມ ແລະ ເກັບກໍາຂໍ້ມູນສິນຄ້າ OTOP ຂອງແຕ່ລະເມືອງໃນທົ່ວແຂວງເຊກອງ; ສຳເລັດຈັດຝຶກອົບຮົມ ແລະ ພັດທະນາເວັບໄຊໃຫ້ບັນດາພະແນກການ ແລະ ເມືອງເປັນຕົ້ນ: ພະແນກສາທາລະນະສຸກແຂວງ, ພະແນກ ຖະແຫຼງຂ່າວ, ວັດທະນະທໍາ ແລະ ທ່ອງທຽວແຂວງ ແລະ ຫ້ອງວ່າການປົກຄອງເມືອງລະມາມ; ສໍາເລັດຈັດຝຶກອົບຮົມການນໍາໃຊ້ຂໍ້ມູນໃນລະບົບເນັດເວີກ Network, ຝຶກອົບຮົມການຂຽນຂ່າວ, ການສ້າງເຊີເວີ ແລະ ການສ້າງເວັບໄຊໃຫ້ພະນັກງານລັດຖະກອນພາຍໃນພະແນກ, ສໍາເລັດຈັດຝຶກອົບຮົມການຄຸ້ມຄອງນໍາໃຊ້ເຕັກໂນ ໂລຊີຄອມພິວເຕີ ໃຫ້ບັນດາຫ້ອງການອ້ອມຂ້າງເມືອງດາກຈຶງ; ສໍາເລັດຈັດຝຶກອົບຮົມຖ່າຍທອດການນໍາໃຊ້ຊອບແວຣຄຸ້ມຄອງເອກະສານໃຫ້ບັນດາພະແນກ ການອ້ອມຂ້າງແຂວງ ແລະ ເມືອງ; ຂຽນຂ່າວ ແລະ ອັບເດດຂ່າວສານລົງໃນໜ້າເວັບໄຊຂອງພະແນກພ້ອມທັງ ສົ່ງໃຫ້ກະຊວງວິທະຍາສາດ ແລະ ເຕັກໂນໂລຊີ ເພື່ອລົງໜັງສືພິມວິທະຍາສາດ ແລະ ການພັດທະນາ ຈໍານວນ 15 ບົດ, ປັບປຸງຍົກລະດັບຂໍ້ມຸນ-ຂ່າວສານໃນໜ້າເວັບໄຊຂອງພະແນກຕົນໃຫ້ມີຄວາມທັນສະໄໝ ຂຶ້ນເລື້ອຍໆ.
ສໍາລັບແຜນການປີ 2019 ຈະສືບຕໍ່ລົງໂຄສະນາເຜີຍແຜ່ກ່ຽວກັບວຽກງານຊັບສິນທາງປັນຍາໃຫ້ແກ່ບັນດາພະແນກການອ້ອມຂ້າງແຂວງ, ຫ້ອງການ ທຽບເທົ່າ, ອົງການຈັດຕັ້ງລັດ, ສອງກໍາລັງປະກອບອາວຸດ, ຫົວໜ່ວຍທຸລະກິດ ແລະ ປະຊາຊົນໃນທົ່ວແຂວງ, ສືບຕໍ່ຕິດຕາມ, ກວດກາ ແລະ ໃຫ້ບໍລິການດ້ານ ຊັບສິນທາງປັນຍາ (ວຽກສິດທິບັດ ອະນຸທິບັດແບບອຸດສາຫະກໍາ, ເຄື່ອງໝາຍການຄ້າ, ວຽກລິຂະສິດ ແລະ ສິດທີ່ກ່ຽວຂ້ອງກັບລິຂະສິດ) ໃຫ້ມີຄວາມເຂັ້ມແຂງ; ສືບຕໍ່ລົງຕິດຕາມກວດກາ, ສອບທຽບ ແລະ ອອກໃບຢັ້ງຢືນພາຫະນະວັດແທກ ໝໍ້ແທກນໍ້າປະປາ, ໝໍ້ນັບໄຟຟ້າ ,ນໍ້າໝັກວັດຖຸມີຄ່າ (ຊິງຊັ່ງຄໍາ) ປະຈໍາປີ 2019; ສຶບຕໍ່ຕິຕາມ,ກວດກາ ແລະ ສອບທທຽບບໍລິມາດຫົວຈ່າຍນໍ້າມັນເຊື້ອໄຟ ໃນທົ່ວແຂວງປະຈໍາແຕ່ລະງວດ ແລະ ອອກໃບຢັ້ງຢືນປະຈໍາປີ ເພື່ອເຮັດໃຫ້ການ ບໍລິການນໍາມັນເຊື້ອໄຟຖືກຕ້ອງຕາມລະບຽບ ແລະ ກົດໝາຍທີ່ກໍານົດເຮັດໃຫ້ມີຄວາມຍຸຕິທໍາໃນທົ່ວສັງຄົມ; ສືບຕໍ່ລົງເກັບກໍາຂໍ້ມູນ ແລະ ຕິດຕາມກວດກາ ການພະລິດຕະພັນສິນຄ້າເຄື່ອງໝາຍການຄ້າ ທີ່ນໍາເຂົ້າ-ສົ່ງອອກ ຕາມທີ່ໄດ້ກໍານົດໄວ້ໃນລະບຽບກົດໝາຍເປັນຕົ້ນ: ມາດຕະຖານຜະລິດຕະພັນສິນຄ້າຫຸ້ມຫໍ່, ເຄື່ອງໄຟຟ້າເອເລັກໂຕນິກ, ໂຮງງານດີນຈີ່, ໂຮງງານນໍ້າດື່ມ, ດິນບ໋ອກ, ມາດຕະຖານເຄື່ອງວັດສະດຸກໍ່ສ້າງທົ່ວໄປ, ສຶບຕໍ່ຊຸກຍູ້ສົ່ງເສີມສະມາຄົມຜູ້ຜະລິດ ສະຫະກອນປູກໂສມ ເພື່ອສະເໜີຈົດທະບຽນຖິ່ນກໍາເນິດໂສມດາກຈຶງໂດຍປະສານສົມທົບກັບພະແນກການທີ່ກ່ຽຂ້ອງ ແລະ ຫ້ອງການຂັ້ນເມືອງ; ລົງກວດສອບ, ສອບທຽບໝໍ້ນັບໄຟຟ້າ ແລະ ໝໍ້ແທກນໍ້າປະປາ ປະຈໍາປີ 2019 ໃນສາມເມືອງໃຫ້ສໍາເລັດ; ດໍາເນີນການແກ້ໄຂຄໍາສະເໜີ, ຄໍາຮ້ອງທຸກກ່ຽວກັບວຽກງານ ມາດຕະຖານການວັດແທກ ແລະ ອື່ນໆໃຫ້ມີຜົນສໍາເລັດຫຼາຍຂື້ນ.
ໂອກາດດຽວກັນຕໍ່ຜົນງານການຈັດຕັ້ງປະຕິບັດວຽກງານໃນ 1 ປີຜ່ານມາ ສາມາດຕີລາຄາຍ້ອງຍໍໃຫ້ແກ່ພະນັກງານ-ລັດຖະກອນພະແນກວິທະຍາສາດ ແລະ ເຕັກໂນໂລຊີແຂວງ ທີ່ມີຜົນງານດີເດັ່ນປະກອບສວນທາງດ້ານເຮື່ອແຮງ ແລະ ສະຕິປັນຍາເຂົ້າໃນການຈັດຕັ້ງປະຕິບັດໜ້າວຽກໃນໄລຍະ 1 ປີ (ປະຈໍາປີ 2018) ຊິ່ງສາມາດຈັດໄດ້IIປະເພດຄື: ຍໍຍ້ອງກົມກອງພະແນກ ວິທະຍາສາດ ແລະ ເຕັກໂນໂລຊີ 1 ໃບ ແລະ ຍ້ອງຍໍບຸກຄົນດີເດັ່ນມີ 16 ຄົນ,ຍິງ 7 ຄົນ ໃຫ້ກຽດຂຶ້ນມອບໃນພິທີດັ່ງກ່າວໂດຍ ທ່ານ ເຫຼັກໄຫຼ ສີວິໄລ ຄະນະປະຈໍາພັກແຂວງ,ຮອງເຈົ້າແຂວງ-ແຂວງເຊກອງ, ຜູ້ຊີ້ນໍາວຽກງານວິທະຍາສາດ ແລະ ເຕັກໂນໂລຊີ ແລະ ໃບຊົມເຊີຍ 2 ຄົນ,ໃຫ້ກຽດຂຶ້ນມອບໃນພິທີດັ່ງກ່າວໂດຍ ທ່ານ ສຸລະພົນ ໝື່ນວິເສດ ເລຂາໜ່ວຍພັກ, ຫົວໜ້າພະແນກ ວິທະຍາສາດ ແລະ ເຕັກໂນໂລຊີແຂວງ. ໃນກອງປະຊຸມຍັງໄດ້ຮັບຟັງການປະກອບຄໍາຄິດຄໍາເຫັນຂອງຫົວໜ້າຫ້ອງການວິທະຍາສາດ ແລະເຕັກໂນໂລຊີເມືອງ 4 ຕົວເມືອງ, ທ່ານເຈົ້າເມືອງ, ຮອງເຈົ້າເມືອງ, ພະແນກການ ແລະ ຫ້ອງການ;
ໃນວາລະສຸດທ້າຍ, ກອງປະຊຸມໄດ້ຮັບຟັງການໂອ້ລົມ ແລະ ໃຫ້ທິດຊີ້ນໍາຂອງທ່ານ ເຫຼັກໄຫຼ ສີວິໄລ ຄະນະປະຈໍາພັກແຂວງ, ຮອງເຈົ້າແຂວງ-ແຂວງເຊກອງ, ຜູ້ຊີ້ນໍາວຽກງານວິທະຍາສາດ ແລະ ເຕັກໂນໂລຊີ, ໂດຍທ່ານໄດ້ເນັ້ນໃຫ້ບາງບັນຫາຄື:
- ວຽກງານຊັບສິນທາງປັນຍາເປັນວຽກທີ່ມີຄວາມສໍາຕໍ່ການດໍາລົງຊີວິດ ໃນຂົງເຂດວັດທະນະທໍາ ເພື່ອປົກປ້ອງຄຸ້ມຄອງ ສະເໜີໃຫ້ຜູ້ກ່ຽວມາຈົດທະບຽນລິຂະສິດ ເຊັ່ນ: ບົດເພງ, ບົດຟ້ອນ, ບົດລໍາ, ຜ້າພື້ນເມືອງ ແລະ ອື່ນໆ;
- ວຽກມາດຕະຖານການກໍ່ສ້າງ ໃຫ້ໄດ້ມາດຕະຖານໂດຍສະເພາະ ຄຸນະພາບເຫລັກເສັ້ນ, ຫີນແຮ່, ດິນຊາຍ, ດິນຈີ່ ແລະ ອື່ນໆ
- ວຽກວິທະຍາສາດ ເຕັກໂນໂລຊີ ນະວັດຕະກໍາກ່ຽວກັບການປູກການລ້ຽງໃຫ້ໄດ້ຮັບເຕັກນິກ ເຂົ້າຊ່ວຍ.
- ວຽກເຕັກໂນໂລຊີຂໍ້ມູນຂ່າວສານ ການສົ່ງເອກະສານຜ່ານທາງ ອີເມວ ແລະ ອື່ນໆທີ່ມີສະດວກຂື້ນກ່ວາເກົ່າ.
ໃນນັ້ນຄະນະພັກ-ຄະນະພະແນກ ຕະຫຼອດຮອດພະນັກງານ-ລັດຖະກອນ ສືບຕໍ່ເສີມຂະຫຍາຍຜົນງານດ້ານດີ, ແກ້ໄຂຈຸດອ່ອນ-ຂໍ້ຄົງຄ້າງ ເພື່ອແນໃສ່ ພັດທະນາວຽກງານວິທະຍາສາດ ແລະ ເຕັກໂນໂລຊີໃຫ້ມີຄວາມເຂັ້ມແຂງປະກອບສ່ວນຢ່າງແຂງແຮງເຂົ້າໃນການພັດທະນາເສດຖະກິດ-ສັງຄົມຂອງຊາດ ກໍຄືຂອງແຂວງເຊກອງ
ບົດຂາວ: ລັດສະໝີ ກົມມະສິດ
ຮູບພາບ: ບຸດດີພົມພິທັກ
