​ຍີນ​ດີ​ຕ້ອນ​ຮັບ ​ສູ່​ເວັບ​ໄຊ ພະ​ແນກ ວິ​ທະ​ຍາ​ສາດ ແລະ ເຕັກ​ໂນ​ໂລ​ຊີ ແຂວງ ເຊກອງ

ກອງປະຊຸມສຳມະນາກ່ຽວກັບການມີສ່ວນຮ່ວມ ໃນການອະນຸລັກ ແລະ ນໍາໃຊ້ພືດເປັນຢາ ແບບ ຍືນຍົງ.

0046ໃນຕອນເຊົ້າຂອງວັນທີ 29 ມັງກອງ ປີ 2019 ຜ່ານມາທີ່ຫ້ອງປະຊຸມ ພະແນກວິທະຍາສາດ ແລະ ເຕັກໂນໂລຊີແຂວງເຊກອງ ໄດ້ຈັດກອງປະຊຸມເຜີຍ ແຜ່ກ່ຽວກັບການມີສ່ວນຮ່ວມ ໃນການອະນຸລັກ ແລະ ນໍາ

ໃຊ້ພືດເປັນຢາແບບຍືນຍົງໃຫ້ບັນດາພະແນກການຕ່າງໆອ້ອມຂ້າງແຂວງ,​ ເມືອງເທດສະບານ ແລະ ຫ້ອງການ ວິທະຍາສາດ ແລະ ເຕັກໂນໂລຊີເມືອງ. ໂດຍພາຍໃຕ້ກິດຈະກຳຂອງໂຄງການສຶກສາຄົ້ນຄ້ວາຊະນິດພັນພຶດທີ່ ເປັນຢາ 10 ຊົນເຜົ່ານຳໃຊ້ໃນ 4 ຕົວເມືອງ ຂອງແຂວງເຊກອງ. ໃຫ້ກຽດເປັນປະທານໂດຍ ທ່ານ ສຸລະພົນ ໝືນວິເສດ  ຫົວໜ້າພະແນກວິທະຍາສາດ ແລະ ເຕັກໂນໂລຊີແຂວງ ມີທ່ານຕາງໜ້າຈາກພະແນກການອ້ອມ ຂ້າງແຂວງ, ເມືອງເທດສະບານ ແລະ ຫ້ອງການວິທະຍາສາດ ແລະ ເຕັກໂນໂລຊີເມືອງ ເຂົ້າຮ່ວມທັງໝົດ 40 ທ່ານ ຍິງ 6 ທ່ານ.

          ຈຸດປະສົງໃນການຈັດກອງປະຊຸມຄັ້ງນີ້ ແມ່ນເພື່ອຈັດຕັ້ງເຜີ່ຍແຜ່ຜົນສໍາເລັດ ໃນການສຶກສາຄົ້ນຄ້ວາ ຊະນິດພັນພືດເປັນຢາ 10 ຊົນເຜົ່ານຳໃຊ້ໃນ 4 ຕົວເມືອງຂອງແຂວງເຊກອງ ເຊິ່ງໃນທີ່ປະຊຸມໄດ້ນຳສະເໜີກ່ຽວກັບການສົ່ງເສີມການມີສ່ວນຮ່ວມໃນການອະນຸລັກ ແລະ ນໍາໃຊ້ພືດເປັນຢາແບບຍືນຍົງ ແລະ ຄວາມສຳຄັນຂອງພືດເປັນຢາຕໍ່ການພັດທະນາທ້ອງຖິ່ນ; ທັງນີ້ກໍ່ເພື່ອເປັນການສ້າງຄວາມຮູ້ ຄວາມເຂົ້າໃຈໃຫ້ພະນັກງານ ຫລັກແຫລ່ງໃນຂະແໜງການຕ່າງໆຂັ້ນແຂວງ,​ ເມືອງເທດສະບານ ແລະ ຫ້ອງການ ວິທະຍາສາດ ແລະ ເຕັກໂນໂລຊີເມືອງ ເຫັນໄດ້ຄວາມສຳຄັນຂອງພືດເປັນຢາ ຕໍ່ການພັດທະນາເສດຖະກິດ-ສັງຄົມທ້ອງຖິ່ນ, ຫັນມາໃຫ້ຄວາມສໍາຄັນໃນການຊຸກຍູ້ສົ່ງເສີມ, ການອະນຸລັກປົກປັກຮັກສາ ແລະ ການຄຸ້ມຄອງ ການຂຸດຄົ້ນ ນຳໃຊ້ໃຫ້ຍືນຍົງ ພ້ອມກັນນີ້ຍັງເປັນການອະນຸລັກພູມປັນຍາທ້ອງຖິ່ນກ່ຽວກັບການນໍາໃຊ້ພືດມາເປັນຢາ ແລະ ມີການພັດທະນາເປັກຜະລິດຕະພັນຂອງທ້ອງຖິ່ນ.

 ໃນໂອກາດນີ້ ຜູ້ແທນກອງປະຊຸມເຊິ່ງມີຜູ້ຕາງໜ້າຈາກບັນດາພະແນກການຕ່າງໆອ້ອມຂ້າງແຂວງ, ເມືອງເທດສະບານ ແລະ ຫ້ອງການວິທະຍາສາດ ແລະ ເຕັກໂນໂລຊີເມືອງ ກໍໄດ້ມີຄວາມເຫັນ ແລກປ່ຽນບົດຮຽນເຊິ່ງກັນ ແລະ ກັນ ຢ່າງກົງໄປກົງມາດ້ວຍບັນຍາກາດທີ່ຟົດຟື້ນ ເພື່ອເຮັດໃຫ້ພືດເປັນຢາໄດ້ຮັບການອະນຸ ລັກຮັກສາ ແລະ ຄຸ້ມຄອງການນຳໃຊ້ໃຫ້ມີຄວາມຍືນຍົງ ພ້ອມທັງສາມາດສຶກສາພັດທະນາຕໍ່ຍອດໃຫ້ກາຍເປັນຜະລິດຕະພັນຂອງທ້ອງຖິ່ນໃນອະນາຄົດ.

ນະໂອກາດທ້າຍນີ້: ທ່ານ ສຸລະພົນ ໝື່ນວິເສດ ຫົວໜ້າພະແນກວິທະຍາສາດ ແລະ ເຕັກໂນໂລຊີແຂວງ, ປະທານກອງປະຊຸມ ໄດ້ຍົກໃຫ້ເຫັນຄວາມສຳ ຄັນຂອງພືດເປັນຢາ ຕໍ່ການພັທະນາເສດຖະກິດ-ສັງຄົມ ບັນດາປະເທດຕ່າງໆ ໃນພາກພື້ນ ແລະ ສາກົນ ເຊິ່ງໃນປະຈຸບັນນີ້ໄດ້ມີການຄົ້ນຄວ້າວິໄຈ ແລະ ພັດທະນາ ຕໍ່ຍອດເປັນຜະລິດຕະພັນ ອອກມາຈຳໜ່າຍ ແລະ ນຳໃຊ້ປິ່ນປົວພະຍາດໃນໂຮງໝໍແຫ່ງຕ່າງຢ່າງຫລວງຫລາຍ ດັ່ງນັ້ນການຂຸດຄົ້ນນຳໃຊ້ພືດດັ່ງກ່າວຈຶ່ງເກີດຂື້ນ ຢ່າງຫລວງຫລາຍຕາມມາ ເຊິ່ງການຂຸດຄົ້ນນັ້ນຍັງຂາດການຄຸ້ມຄອງທີ່ດີ ແລະ ມີລັກສະນະບໍ່ຍືນຍົງ ເຮັດໃຫ້ນັບມື້ນັບຫລຸດໜ້ອຍຖ່ອຍລົງເລື້ອຍໆ ມີຄວາມສ່ຽງ ທີ່ຈະສູນພັນ ພ້ອມນັ້ນທ່ານຍັງໄດ້ຮຽກຮ້ອງໄປຍັງທຸກໆຂະແໜງການຈົ່ງຊ່ວຍກັນສົ່ງເສີມໃນການອະນຸລັກຮັກສາພູມປັນຍາຂອງປະຊາຊົນບັນດາເຜົ່າ ໃນການນຳໃຊ້ພືດເປັນຢາ ແລະ ໃຫ້ມີການຄຸ້ມຄອງນຳໃຊ້ໃຫ້ມີລັກສະນະຍືນຍົງ.

ຮູບພາບ: ບຸດດີ ພົມພິທັກ

ຂາວ: ອວຍພອນ

0047 0048 0049 0050 0051 0052 0053 0054 0055

 

 

 

 

ສ້າງຂື້ນໃນ ປີ 2015. ສະຫງວນລິຂະສິດໂດຍ: ພະແນກວິທະຍາສາດ ແລະ ເຕັກໂລຊີແຂວງເຊກອງ, ຕັ້ງຢູ່ບ້ານ ໃໝ່ຫົວເມືອງ, ເມືອງ ລະມາມ, ແຂວງ ເຊກອງ, ໂທຣ:(+856)38211646, ແຟກ:(+856)38211646
Powered by Joomla 1.7 Templates