​ຍີນ​ດີ​ຕ້ອນ​ຮັບ ​ສູ່​ເວັບ​ໄຊ ພະ​ແນກ ວິ​ທະ​ຍາ​ສາດ ແລະ ເຕັກ​ໂນ​ໂລ​ຊີ ແຂວງ ເຊກອງ

ການນຳພະແນກວິທະຍາສາດ ແລະເຕັກໂນໂລ ຊີແຂວງເຊກອງເຂົ້າຮ່ວມຝຶກອົບຮົມຢູ່ສູນກາງ

  ໃນລະຫວ່າງວັນທີ 13 ຫາ 20 ກໍລະກົດ 2020 ຄະນະນຳຂອງພະແນກວິທະຍາສາດ ແລະ ເຕັກໂນ ໂລຊີແຂວງເຊກອງ ເຂົ້າຮ່ວມຝຶກອົບຮົມກ່ຽວກັບ ການຄຸ້ມຄອງວຽກງານວິທະຍາສາດ ແລະ ເຕັກໂນ ໂລຊີ ສຳລັບພະນັກງານ

ຕຳແໜ່ງຜູ້ບໍລິຫານລະດັບສູງ (ປະເພດ 3) ຢູ່ທີ່ສະຖາບັນຄຸ້ມຄອງວິທະຍາສາດ ແລະເຕັກໂນໂລຊີ, ກະຊວງວິທະຍາສາດ ແລະເຕັກໂນໂລຊີ ໃຫ້ກຽດເປັນປະທານໃນພິທີເປີດຄັ້ງນີ້ໂດຍທ່ານ ບັນດິດ ສຈ ບໍ່ວຽງຄຳ ວົງດາລາ ກຳມະການສູນກາງພັກ, ເລຂາຄະນະພັກ, ລັດຖະມົນຕີກະຊວງວິທະຍາສາດ ແລະເຕັກໂນໂລຊີ, ມີບັນດາທ່ານຮອງລັດຖະມົນຕີ,​ ຫົວໜ້າຫ້ອງການ, ຫົວໜ້າກົມ, ຮອງຫົວໜ້າກົມ, ຫົວໜ້າສະຖາບັນ, ຮອງຫົວ ໜ້າສະຖາບັນ ອ້ອມຂ້າງກະຊວງ ແລະບັນດາທ່ານຫົວໜ້າພະແນກ, ຮອງຫົວໜ້າພະແນກວິທະຍາສາດ ແລະເຕັກໂນໂລຊີແຂວງທົ່ວປະເທດເຂົ້າຮ່ວມ.

 ຈຸດປະສົງຂອງການຝຶກອົບຮົມດັ່ງກ່າວ ແມ່ນເພື່ອຖ່າຍທອດຄວາມຮູ້ກ່ຽວກັບການຄຸ້ມຄອງວິທະຍາສາດ ແລະ ເຕັກໂນໂລຊີ, ສ້າງທັກສະໃນການນຳພາວຽກງານ ທັງເປັນການຍົກລະດັບຄວາມຮູ້-ຄວາມສາມາດ ໃນການປະຕິບັດໜ້າທີ່ວຽກງານທີ່ໄດ້ມອບໝາຍ ແນໃສ່ເຮັດໃຫ້ໄດ້ຮຽນຮູ້ ແລະ ເພີ່ມຄວາມເຂົ້າໃຈ ດ້ານທິດສະດີ, ຫຼັກການ ແລະ ແຜນພັດທະນາ ກ່ຽວກັບວຽກງານການຄຸ້ມຄອງວິທະຍາສາດ ແລະ ເຕັກໂນໂລຊີ ຂອງ ສປປ ລາວ.

 ວິທະຍາກອນທີ່ມາຖ່າຍທອດບົດຮຽນ ແລະປະສົບການໃນຄັ້ງນີ້ ໃຫ້ກຽດນຳພາໂດຍທ່ານ ບັນດິດ ສຈ ບໍ່ວຽງຄຳ ວົງດາລາ ລັດຖະມົນຕີກະຊວງວິທະຍາສາດ ແລະເຕັກໂນໂລຊີ, ນອກນັ້ນຍັງມີບັນດາທ່ານຫົວໜ້າກົມ ແລະຫົວໜ້າສະຖາບັນອ້ອມຂ້າງກະຊວງເປັນຜູ້ມາຖ່າຍທອດບົດຮຽນ ແລະປະສົບການຕ່າງໆໃຫ້ແກ່ນັກ ສຳມະນາກອນໃນຄັ້ງນີ້, ສ່ວນເປົ້າໝາຍນັກສຳມະນາກອານຜູ້ເຂົ້າຮ່ວມໃນການຝຶກອົບຮົມສຳມະນາໃນຄັ້ງນີ້ແມ່ນເລັ່ງໃສ່ພະນັກງານຕຳແໜງຜູ້ບໍລິຫານປະເພດ 3 ແລະປະເພດ 4 ທີ່ມີເປົ້າໝາຍໃນການກ້າວຂຶ້ນເປັນຜູ້ບໍລິຫານປະເພດ 3 ເຂົ້າຮ່ວມ ເຊິ່ງປະກອບດ້ວຍຮອງຫົວໜ້າກົມ, ຮອງຫົວໜ້າສະຖານບັນອ້ອມຂ້າງກະຊວງ ແລະບັນດາທ່ານຫົວໜ້າພະແນກ, ຮອງຫົວໜ້າພະແນກວິທະຍາສາດ ແລະເຕັກໂນໂລຊີໃນຂອບເຂດທົ່ວປະເທດເຂົ້າຮ່ວມ. ບັນດາຫົວຂໍ້ທີ່ຈັດສຳມະນາປະກອບດ້ວຍ ການຮຽນຮູ້ການເປັນຜູ້ນຳ; ການປະຕິວັດອຸດສາຫະກຳຄັ້ງທີ 4 ແລະການພັດທະນາວິທະຍາສາດ ແລະ ເຕັກໂນໂລຊີຂອງ ສປປ ລາວ; ການຄຸ້ມຄອງລັດ ຕໍ່ວຽກງານວິທະຍາສາດ ແລະລັງສີນີວເຄຼຍ; ການຄຸ້ມຄອງວຽກງານແຜນການດ້ານວິທະຍາສາດ ແລະເຕັກໂນໂລຊີ; ການຄຸ້ມຄອງລັດກ່ຽວກັບວຽກງານເຕັກໂນໂລຊີ ແລະນະວັດຕະກຳ; ການຄຸ້ມຄອງລັດກ່ຽວກັບວຽກງານມາດຕະຖານ ແລະການວັດແທກ; ການຄຸ້ມຄອງຊັບພະຍາກອນມະນຸດໃນຂະແໜງວິທະຍາສາດ ແລະເຕັກໂນໂລຊີ; ການຄຸ້ມຄອງວຽກງານວິທະຍາສາດ ແລະເຕັກໂນໂລຊີຂອງທ້ອງຖິ່ນ; ທ່າແຮງບົ່ມຊ້ອນຂອງວຽກງານວິທະຍາສາດ ແລະເຕັກໂນໂລຊີ; ການຄຸ້ມຄອງລັດກ່ຽວກັບວຽກງານເຕັກໂນໂລຊີດີຈິຕ໋ອນ; ການຄຸ້ມຄອງກອງທຶນພັດທະນາວິທະຍາສາດ ແລະເຕັກໂນໂລຊີ, ການຄຸ້ມຄອງລັດກ່ຽວກັບວຽກງານຊັບສິນ ທາງປັນຍາ, ການຄົ້ນຄວ້າພັດທະນານິເວດວິທະຍາ ແລະເຕັກໂນໂລຊີຊີວະພາບ; ການຄົ້ນຄວ້າພັດທະນາພະລັງງານທົດແທນ ແລະວັດສະດຸໃໝ່; ການຄົ້ນຄວ້າພັດ ທະນາເຕັກໂນໂລຊີຄອມພິວເຕີ ແລະເອເລັກໂຕຣນິກ ແລະວຽກງານກວດກາລັດໃນຂະແໜງວິທະຍາສາດ ແລະເຕັກໂນໂລຊີ ນອກຈາກນັ້ນຍັງໄດ້ລົງ ເຄື່ອນໄຫວທັດສະນະສຶກສາຢ້ຽມຢາມພື້ນຖານໂຄງລ່າງທີ່ນຳໃຊ້ເຂົ້າການຄົ້ນຄວ້າ, ພັດທະນາ ແລະຄຸ້ມຄອງວຽກງານວິທະຍາສາດ ແລະເຕັກໂນໂລຊີ ຕາມບັນດາກົມ, ສະຖາບັນ ແລະສູນຕ່າງໆອີກດ້ວຍ.

 ນະໂອກາດດັ່ງກ່າວນັ້ນ ກໍຍັງມີກອງປະຊຸມພິເສດ ເພື່ອພົບປະແລກປ່ຽນບົດຮຽນ ລະຫວ່າງສູນກາງກໍຄືບັນດາກົມ ແລະທ້ອງຖິ່ນ ກໍຄືພະແນກວິທະຍາສາດ ແລະເຕັກໂນໂລຊີແຂວງ ເຊິ່ງໃນກອງປະຊຸມຄັ້ງນີ້ ໄດ້ຍົກເອົາເນື້ອໃນພາລະບົດບາດຂອງພະແນກວິທະຍາສາດ ແລະເຕັກໂນໂລຊີ ສະບັບປັບປຸງໃໝ່ມາສົນທະນາ ແລະເອກະພາບຮັບຮອງເອົາ ນອກນີ້ກໍຍັງມີການສົນທະນາແລກປ່ຽນບົດຮຽນກ່ຽວກັບການແບ່ງຂັ້ນຄຸ້ມຄອງລະຫວ່າງສູນກາງ ແລະທ້ອງຖິ່ນໃຫ້ລະອຽດຈະ ແຈ້ງຂຶ້ນຕື່ມ ໃນວະລະໂອກາດທ້າຍຮອດເວລາ 12:00 ໂມງ ຂອງວັນທີ 20 ກໍລະກົດ 2020 ໄດ້ມີພິທີມອບໃບຢັ້ງຢືນຜ່ານການຝຶກອົບຮົມໃຫ້ແກ່ນັກສຳມະນາກອນ ແລະໃຫ້ກຽດໂອ້ລົມຊີ້ນຳຈາກທ່ານ ລັດຖະ ມົນຕີກະຊວງວິທະຍາສາດ ແລະເຕັກໂນໂລຊີ ແລະກ່າວປິດພິທີຈັດຝຶກອົບຮົມສຳມະນາຄັ້ງນີ້ຢ່າງເປັນທາງການ.

ບົດຂ່າວ-ຮູບພາບ: ຄ່ຽມແກ້ວ


ສ້າງຂື້ນໃນ ປີ 2015. ສະຫງວນລິຂະສິດໂດຍ: ພະແນກວິທະຍາສາດ ແລະ ເຕັກໂລຊີແຂວງເຊກອງ, ຕັ້ງຢູ່ບ້ານ ໃໝ່ຫົວເມືອງ, ເມືອງ ລະມາມ, ແຂວງ ເຊກອງ, ໂທຣ:(+856)38211646, ແຟກ:(+856)38211646
Powered by Joomla 1.7 Templates