​ຍີນ​ດີ​ຕ້ອນ​ຮັບ ​ສູ່​ເວັບ​ໄຊ ພະ​ແນກ ວິ​ທະ​ຍາ​ສາດ ແລະ ເຕັກ​ໂນ​ໂລ​ຊີ ແຂວງ ເຊກອງ

ພະແນກ ວຕ ແຂວງເຊກອງ ລົງຊຸກຍູ້ວຽກງານ ວິທະຍາສາດ ແລະ ເຕັກໂນໂລຊີ ເມືອງດາກຈຶງ

ຕອນເຊົ້າວັນທີ 9 ມີຖຸນາ 2020 ຜ່ານມານີ້, ຢູ່ທີ່ສະໂມສອນຂອງ ເມືອງດາກຈຶງ, ໄດ້ຈັດກອງປະ ຊຸມເຜີຍແຜ່ນິຕິກໍາ ກ່ຽວກັບວຽກງານວິທະຍາສາດ

ແລະ ເຕັກໂນໂລຊີ ໂດຍ​ການ​ໃຫ້ກຽດເປັນ ປະທານຮ່ວມຂອງ ທ່ານ ສຸລະພົນ ໝືນວິເສດ ຫົວໜ້າພະແນກ ວິທະຍາສາດ ແລະ ເຕັກໂນໂລຊີ ແຂວງ, ທ່ານ ຄຳເ​ພັດ ສອນຈະເລີນ,ຮອງເຈົ້າເມືອງ-ເມືອງດາກຈຶງ, ​ ມີຫົວ​ໜ້າ​ຫ້ອງ​ການ, ຮອງ​ຫົວ​ໜ້າ​ຫ້ອງ​ການ, ວິ​ຊາ​ການພາຍ​ໃນຫ້ອງ​ການ ວ​ຕ ເມືອງ, ຫ້ອງການອ້ອມ​ຂ້າງ​ເມືອງ ແລະ ແຂກຖືກເຊີນເຂົ້າຮ່ວມທັງ​ໝົດ 38 ທ່ານ ຍິງ 9 ທ່ານ.

 ການລົງຊຸກຍູ້ເຄື່ອນໄຫວວຽກງານໃນຄັ້ງນີ້ ຍັງໄດ້ຮັບຟັງການລາຍງານຂອງທ່ານ ນາງ ວັນນະຫຼິງ ຈັນທະພອນ ຮອງ​ຫົວໜ້າຫ້ອງ​ການ​ວິ​ທະ​ຍາ​ສາດ ​ແລະ ເຕັກ​ໂນ​ໂລ​ຊີເມືອງ ກ່ຽວກັບການຈັດຕັ້ງປະຕິບັດວຽກງານ ວິທະຍາສາດ ແລະ ເຕັກໂນໂລຊີ ໃນ​ໄລ​ຍະຜ່ານ​ມາ ແລະ ທິດທາງແຜນໃນຕໍ່ໜ້າໃຫ້ທີ່ປະຊຸມຮັບຊາບ.

ໂອກາດດັ່ງກ່າວນີ້ ຊື່ງທ່ານ ຫົວໜ້າພະແນກ ກໍ່ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຫ້ອງການວິທະຍາສາດ ແລະ ເຕັກໂນໂລຊີເມືອງດາກຈຶງ ປະຕິບັດໄດ້ ໃນໄລຍະຜ່ານມາ. ທ່ານຍັງໄດ້ໃຫ້ຫ້ອງການເອົາໃຈໃສ່ຕໍ່ການປະສານສົມທົບກັບພາກສ່ວນຕ່າງໆທີ່ກ່ຽວຂ້ອງເພື່ອນໍາເອົາວຽກງານວິທະຍາສາດ ແລະ ເຕັກໂນໂລຊີປະ ກອບ ສ່ວນເຂົ້າໃນການພັດທະນາເສດຖະກິດ-ສັງຄົມຂອງເມືອງ ເຮັດໃຫ້ວຽກງານ ວິທະຍາສາດ ແລະ ເຕັກໂນໂລຊີ ຢູ່ຂັ້ນເມືອງ ໄດ້ຮັບການເຄື່ອນໄຫວຢ່າງຕໍ່ນື່ອງ ແລະ ມີຄວາມເຂັ້ມແຂງຂື້ນກວ່າເກົ່າ ໃນການຄຸ້ມຄອງວຽກງານວິທະຍາສາດ ແລະ ເຕັກໂນໂລຊີຂັ້ນມືອງເຊັ່ນ: ຜັນຂະຫຍາຍບັນດານິຕິກໍາ ມາເປັນແຜນ ການ,ໂຄງການອັນລະອຽດ ແລະ ແບບແຜນວິທີການເຮັດວຽກ, ເອົາໃຈໃສ່ຕໍ່ການຄົ້ນຫາແຫລ່ງລາຍຮັບເພື່ອມອບເຂົ້າງົບປະມານຂອງລັດ, ຄົ້ນຄ້ວາແລະສ້າງແຜນພັດ ທະນາເສດຖະກິດ - ສັງຄົມຂອງເມືອງ,ການແບ່ງຄວາມຮັບຜິດຊອບ,ໂດຍສະເພາະ ການແບ່ງຂັ້ນຄຸ້ມຄອງໃຫ້ມີຄວາມເປັນເອກະພາບ, ສ້າງຄວາມສາມັກຄີບົນພື້ນ ຖານການຊີ້ນໍາ-ນໍາຂອງພັກ.

ທ່ານຮອງເຈົ້າເມືອງ-ເມືອງດາກຈຶງ,ໄດ້ມີຄໍາເຫັນຕໍ່ກອງປະຊຸມໃນຄັ້ງນີ້ວ່າ: ການເຜີຍແຜ່ກົດໝາຍ ແລະ ສ້າງຄວາມເຂັ້ມແຂງໃຫ້ແກ່ຂະແໜງການທ້ອງຖິ່ນ ແລະ ຜູ້ປະກອບການໃນຄັ້ງນີ້ແມ່ນມີຄວາມໝາຍຄວາມສໍາຄັນຫຼາຍເພາະເປັນການກະຕຸກຊຸກຍູ້ ແລະ ສ້າງຄວາມເຂັ້ມແຂງທາງດ້ານວິຊາການໃນຂະແໜງວິທະຍາສາດ ແລະເຕັກໂນໂລຊີ ທ້ອງຖິ່ນ ແລະ ຜູ້ປະກອບການ ໂດຍສະເພາະຂະແໜງການທີ່ກ່ຽວຂ້ອງຈຳເປັນຕ້ອງໄດ້ມີການພົວພັນ ຮ່ວມມືປະສານສົມທົບກັນໃນການຈັດ ຕັ້ງປະຕິບັດ. ການອອກຂໍ້ຕົກລົງ, ຂໍ້ກຳນົດ, ລະບຽບກົດໝາຍໃຫ້ຖືກຕ້ອງສອດຄ່ອງ ມີຄວາມເປັນເອກະພາບ ບົນພື້ນຖານລະບຽບກົດໝາຍ ໂດຍແນ່ໃສ່ຊຸກ ຍູ້ສົ່ງເສີມໃຫ້ຜູ້ປະກອບ, ການບໍລິການ ແລະ ຜະລິດຕະພັນສິນຄ້າທີ່ມີຄຸນນະພາບ, ປົກປ້ອງລິຂະສິດ, ຊັບສິນທາງປັນຍາຂອງຕົນ ໃຫ້ແທດເໝາະກັບສະພາບຄວາມ ເປັນຈິງ ບໍ່ໃຫ້ມີການເອົາປຽບ ລະຫວ່າງຜູ້ໃຫ້ບໍລິການ ແລະ ຜູ້ໃຊ້ບໍລິການ ເຮັດ​ໃຫ້​ສັງ​ຄົມມີຄວາມຍຸຕິທຳ.

ຊື່ງທ່ານ ຫົວໜ້າພະແນກຍັງໄດ້ຮຽກໃຫ້ພະນັກງານ-ລັດຖະກອນ,ຜູ້ປະກອບການທຸລະກິດ, ກຸ່ມຜູ້ຜະລິດ ແລະ ປະຊາຊົນພາຍໃນ​ເມືອງໄດ້ຮັບຮູ້ ແລະ ເຂົ້າໃຈແຈ້ງຕື່ມຕໍ່ພາລະບາດບາດ, ໜ້າທີ່ຂອງຂະແໜງວິທະຍາສາດ ແລະ ເຕັກໂນໂລຊີຂັ້ນແຂວງ ແລະເມືອງ, ໃນການຈັດຕັ້ງຜັນລະບຽບ, ກົດໝາຍກ່ຽວກັບ ວິທະຍາສາດ ແລະ ເຕັກໂນໂລຊີຫຼາຍຂຶ້ນ ເຊິ່ງ​ຜູ້ຂົ້າຮ່ວມກອງປະຊຸມຍັງໄດ້ຮັບຟັງການບັນຍາຍກົດ​ໝາຍ​ຈາກວິທະຍາກອນທີ່ມາຈາກ ພວຕ ແຂວງ​ນຳ​ໄປ​ເຜີຍ​ແຜ່​ໃນ​ຄັ້ງ​ນີ້​ປະ​ກອບ​ມີ: ກົດໝາຍວິທະຍາສາດ ແລະ ເຕັກໂນໂລຊີ, ກົດໝາຍວ່າ ດ້ວຍຊັບສິນທາງປັນຍາ, ກົດໝາຍມາດຕະຖານ ແລະ ກົດໝາຍການວັດແທກ, ຜ່ານການເຜີຍແຜ່ໃນຄັ້ງນີ້ເຮັດໃຫ້ບັນດາຂະແໜງການ, ຫົວ​ໜ່ວຍ​ທຸ​ລະ​ກິດ, ກຸ່ມຜູ້ຜະລິດ ແລະ ປະຊາຊົນເຂົ້າໃຈຕື່ມກ່ຽວກັບວຽກງານວິທະຍາສາດ ແລະ ເຕັກໂນໂລຊີ ແມ່ນຕິດພັນກັບທຸກຂົງເຂດວຽກ​ງານ ເປັນຕົ້ນຫຼັກໆແມ່ນ ອຸດສາຫະກຳ ແລະ ການຄ້າ, ກະສິກຳ-ປ່າໄມ້, ສາທາລະນະສຸກ, ຊັບພະຍາກອນທຳມະຊາດ ແລະສິ່ງແວດລ້ອມ ແລະ ອື່ນໆ. ໃນກອງປະຊຸມຍັງໄດ້ມີການສົນທະນາແລກປ່ຽນຄໍາຄິດຄໍາເຫັນຂອງຜູ້ແທນຢ່າງມີບັນຍາດອັນຟົດຟື້ນ.

ໃນ​ຕອນ​ທ້າຍ ທ່ານ ຫົວໜ້າພະແນກວິທະຍາສາດ ແລະ ເຕັກໂນໂລຊີ ແຂວງ ເຊກອງ ຍັງໄດ້ຍົກໃຫ້ເຫັນຄວາມໝາຍຄວາມສຳຄັນຂອງວຽກງານວິທະຍາສາດ ແລະ ເຕັກໂນໂລຊີ ທີ່ເປັນປັດໄຈສຳຄັນ ເພື່ອຂັບເຄື່ອນການພັດທະນາເສດຖະກິດ-ສັງຄົມ ແລະ ການຫັນເປັນ ອຸດສາຫະກຳ ແລະ ທັນສະໄໝ ທີ່ຕິດພັນໂດຍກົງ ກັບການດຳລົງຊີວິດຕົວຈິງໃນທົ່ວສັງຄົມ ແນໃສ່ເຮັດໃຫ້ບັນດານິຕິກຳ ຖືກນໍາໄປຈັດຕັ້ງປະຕິບັດໃນຕໍ່ໜ້າຢ່າງເຂັ້ມງວດ,ໃຫ້ທຸກຄົນມີສະຕິເປັນເຈົ້າການປົກປ້ອງຮ່ວມມື ກັນ ເພື່ອຜົນປະໂຫຍດຂອງຫົວໜ່ວຍທຸລະກິດ ແລະ​ ພໍ​ແມ່​ປະ​ຊາ​ຊົນຜູ້ບໍລິໂພກ.

                                                                                                          ບົດ​ຂ່າວ ແລະ ຮູບ​ພາບ: ຄ່ຽມແກ້ວ ແກ້ວດວງມະນີ

ສ້າງຂື້ນໃນ ປີ 2015. ສະຫງວນລິຂະສິດໂດຍ: ພະແນກວິທະຍາສາດ ແລະ ເຕັກໂລຊີແຂວງເຊກອງ, ຕັ້ງຢູ່ບ້ານ ໃໝ່ຫົວເມືອງ, ເມືອງ ລະມາມ, ແຂວງ ເຊກອງ, ໂທຣ:(+856)38211646, ແຟກ:(+856)38211646
Powered by Joomla 1.7 Templates