ແຂວງເຊກອງ ສໍາມະນາກ່ຽວກັບການປະຕິວັດ ອຸດສາຫະກໍາຄັ້ງທີ 4

| Print |
Category: ຂ່າວສານ ການເຄື່ອນໄຫວຂອງການນຳແຂວງ
Written by ບຸດ​ດີ

 ໃນຕອນເຊົ້າຂອງວັນທີ 29 ກັນຍາ 2020 ທີ່ຜ່ານມາ, ຢູ່ທີ່ສະໂມສອນໃຫ່ຍ ແຂວງເຊກອງ ໄດ້ຈັດກອງປະຊຸມ ສຳມະນາ ກ່ຽວກັບການປະຕິ ວັດອຸດສາຫະກຳ ຄັ້ງທີ 4 ຫຼື ການປະຕິວັດ ອຸດສາ ຫະກຳຍຸກ 4.0

ໂດຍໃຫ້ກຽດເປັນປະທານຮ່ວມຂອງທ່ານ ບັນດິດ ສຈ. ບໍ່ວຽງຄຳ ວົງດາລາ, ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ(ກວຕ), ທ່ານ ເຫຼັກໄຫຼ ສີວິໄລ, ເຈົ້າແຂວງໆເຊກອງ, ມີຄະນະປະຈຳພັກແຂວງ, ປະທານສະພາປະຊາຊົນແຂວງ, ບັນດາທ່ານເຈົ້າເມືອງ, ບັນດາຫົວໜ້າຫ້ອງການ, ກົມ, ສະຖາບັນ ຈາກ ກວຕ, ບັນດາພະແນກ ແລະ ພະນັກງານທີ່ກຽວຂ້ອງເຂົ້າຮ່ວມ.

ໂອກາດດັ່ງກ່າວ, ທ່ານ ບັນດິດ ສຈ. ບໍ່ວຽງຄຳ ວົງດາລາ ໄດ້ມີຄຳເຫັນກ່າວເປີດກອງປະຊຸມ ແລະ ໃຫ້ກຽດບັນຍາຍໃນຫົວຂໍ້ ບົດບາດຄວາມສຳຄັນຂອງການປະຕິວັດອຸດສາຫະກຳ 4.0 ຊຶ່ງທ່ານ ໄດ້ຍົກໃຫ້ເຫັນກ່ຽວກັບການປະຕິວັດອຸດສາຫະກຳໃນແຕ່ລະໄລຍະຜ່ານມາ ຊຶ່ງໃນການປະຕິວັດອຸດສາຫະ ກຳ ຄັ້ງທີ 4 ຫຼື ເອີ້ນວ່າ ຍຸກອຸດສາຫະກຳ 4.0 ນີ້ ບໍ່ພຽງແຕ່ຜະລິດກະສິກຳ, ອຸດສາຫະກຳ, ການຄ້າ ແລະ ການບໍລິ ການເທົ່ານັ້ນ ແຕ່ຍັງມີບົດບາດສຳຄັນຢ່າງໃຫຍ່ຫຼວງໃນຂົງເຂດປ້ອງກັນຊາດ-ປ້ອງກັນຄວາມສະ ຫງົບ, ວັດທະນະທຳ-ສັງຄົມ ແລະ ການຄຸ້ມຄອງບໍລິຫານລັດອີກດ້ວຍ. ການປະຕິວັດອຸດສາຫະກຳ ຄັ້ງທີ 4 ໄດ້ນຳມາທັງກາລະໂອກາດ ແລະ ສີ່ງທ້າທາຍສູ່ມ່ວນມະນຸດໃນດ້ານເສດຖະກິດ, ດ້ານການເງິນ, ທານະຄານ ແລະ ການບໍລິການ, ດ້ານປ້ອງກັນຊາດ-ປ້ອງກັນຄວາມສະຫງົບ ແລະ ສັງຄົມ.

 ໃນປັດຈຸບັນທ່າອ່ຽງດັ່ງກ່າວກຳລັງເປັນທ່າອ່ຽງແຫ່ງການພັດທະນາຂອງບັນດາປະເທດພາກພື້ນໃນໂລກ ໄລຍະຜ່ານມາພັກ-ລັດໄດ້ເອົາໃຈໃສ່ຕໍ່ວຽກງານຄົ້ນຄວ້າວິທະຍາ ສາດ ແລະ ເຕັກໂນໂລຊີ ຢູ່ ສປປ ລາວ ຊື່ງເຮັດ ໃຫ້ຫຼາຍຂະແໜງມີການຂະຫຍາຍຕົວອອກ ແລະ ທ່າອ່ຽງຂອງການພັດທະນາ ມີລັກສະນະກ້າວກະໂດດ ເປັນຕົ້ນ ແມ່ນ ຂະແໜງກະສິກຳ-ປ່າໄມ້, ສາທາລະນະສຸກ, ສຶກສາທິການ, ວັດທະນະທຳ, ວິທະຍາສາດ-ເຕັກໂນໂລຊີ ແລະ ຂະແໜງບໍລິການອື່ນໆ. ປັດຈຸບັນ, ກະຊວງວິທະຍາສາດ ແລະ ເຕັກໂນໂລຊີ ໄດ້ມີຜົນສຳເລັດການຄົ້ນຄວ້າ ທາງດ້ານວິທະຍາສາດ ແລະ ເຕັກໂນໂລຊີ ແລະ ຄວາມຮູ້ບົ່ມຊ້ອນທາງດ້ານວິຊາການເພື່ອໄປຜັນຂະຫຍາຍຊຸກ ຍູ້ສົ່ງເສີມ ການຜະລິດກະສິກຳ ແລະ ການບໍລິການ, ຄຸນນະພາບຂອງການຜະລິດໂດຍນຳໃຊ້ເຕັກໂນໂລຊີທີ່ທັນ ສະໄໝ ເພື່ອບຸກທະລຸເປົ້າໝາຍພັດທະນາຂອງລັດຖະບານ ເປັນຕົ້ນແມ່ນການຫັນເປັນອຸດສາຫະກຳ ແລະ ທັນສະໄໝ, ສ້າງເປັນໂຄງການຕົວແບບ ໃນການນຳໃຊ້ວິທະຍາສາດ-ເຕັກໂນໂລຊີ ແລະ ນະວັດຕະກຳ ທີ່ກ້າວໜ້າ ທັນສະໄໝ ແລະ ເໝາະສົມ ເພື່ອຕອບສະໜອງຄວາມຕ້ອງການຂອງທ້ອງຖີ່ນ ແລະ ປະຊາຊົນ ໃນການ ຍົກລະດັບການຜະລິດ, ມີຄຸນນະພາບຫຼາຍຂື້ນ ແລະ ກວ້າງຂວາງກວ່າເກົ່າ.

 ພາຍຫຼັງສຳເລັດກອງປະຊຸມສຳມະນາດັ່ງກ່າວ ກໍໄດ້ມີພິທີໄດ້ເຊັນບົດບັນທຶກຄວາມເຂົ້າໃຈ ວ່າດ້ວຍການ ຮ່ວມມືດ້ານການຄົ້ນຄວ້ານຳໃຊ້ວິທະຍາສາດ ແລະ ເຕັກໂນໂລຊີ ທີ່ທັນສະໄໝເພື່ອສົ່ງເສີມ ແລະ ພັດທະນາເສດຖະກິດ-ສັງຄົມ ຂອງແຂວງເຊກອງ ລະຫວ່າງ ກະຊວງວິທະຍາສາດ ແລະ ເຕັກໂນໂລຊີ ກັບ ແຂວງເຊກອງ ລົງນາມໂດຍ ທ່ານ ບັນດິດ ສຈ. ບໍ່ວຽງຄຳ ວົງດາລາ ແລະ ທ່ານ ເຫຼັກໄຫຼ ສີວິໄລ. ພ້ອມດຽວກັນນັ້ນ, ກໍມີພິທີລົງນາມບົດບັນທຶກແຮກສ່ຽວ ລະຫວ່າງ ຄະນະບໍລິຫານງານຊາວໜຸມ ປະຊາຊົນປະຕິວັດລາວ ກະຊວງວິທະຍາສາດ ແລະ ເຕັກໂນໂລຊີ ກັບ ຄະນະບໍລິຫານງານຊາວໜຸມ ປະຊາຊົນປະຕິວັດລາວ ແຂວງເຊກອງ ເພື່ອເປັນການຮ່ວມມື ແລະ ຮັດແໜ້ນຄວາມສາມັກຄີ ເຊິ່ງກັນ ແລະ ກັນ ລົງນາມໂດຍ ທ່ານ ພຸດທະສັກ ວິຈິດຕຣາ, ເລຂາຄະນະບໍລິຫານງານຊາວໜຸມ ປະຊາຊົນປະຕິວັດລາວ ກະຊວງວິທະຍາສາດ ແລະ ເຕັກໂນໂລຊີ ແລະ ທ່ານ ປອ. ຕຸລາວັນ ວົງໄຊ, ເລຂາຄະນະບໍລິຫານງານຊາວໜຸມ ປະຊາຊົນປະຕິວັດລາວ ແຂວງເຊກອງ.

 ໃນໂອກາດດຽວກັນນີ້, ກະຊວງວິທະຍາສາດ ແລະ ເຕັກໂນໂລຊີ ໄດ້ມອບລົດຕູ້ຈຳນວນ 1 ຄັນ ໃຫ້ພະແນກວິທະຍາສາດ ແລະ ເຕັກໂນໂລຊີ ແຂວງເຊກອງ ເພື່ອຮັບໃຊ້ເຂົ້າໃນການເຄື່ອນໄຫວວຽກງານ ຂອງພະແນກ ຊຶ່ງມອບໂດຍ ທ່ານ ວຽງທອງ ວົງທະວິໄລ, ຫົວໜ້າກົມມາດຕະຖານ ແລະ ວັດແທກ ແລະ ຮັບໂດຍ ທ່ານ ສຸລະພົນ ໝື່ນວິເສດ, ຫົວໜ້າພະແນກວິທະຍາສາດ ແລະ ເຕັກໂນໂລຊີ ແຂວງເຊກອງ.

   


 

ຂ່າວ ແລະຮູບພາບ: ມະນີໄຊ ເທບໄກສອນ